१४ प्रदेश पाय्छि जूगु जनजाति सभासद ककसया धारणा

संविधानसभाय् दुपिं आदिवासी जनजाति सभासदतय् पुचः ककसं राज्यया पुनःर्संरचना व राज्य शक्तिया बाँडफाँट समितिं न्ह्यब्वःगु १४ प्रदेश पाय्छि जूगु धासें थःगु आधिकारिक धारणा पितबिउगु दु ।

शनिवाः येँय् ग्वसाःग्वःगु छगू ज्याझ्वःया दथुइ सभामुख सभाषचन्द्र नेम्वाङं ककसया धारणा सार्वजनिक यानादीगु खः । ककसं १४ प्रदेश सिद्धान्ततः पाय्छि जूगु तर सीमाय् हेरफेर यायेमाःगु न्ह्यथंगु दु । अथेहे ककसं संविधानया मौलिक हक अन्तर्गत 'आदिवासी जनजातितय् हक' धकाः न्ह्यथनेमाःगु माग नं याःगु दु ।

न्हूगु नेपाःया निर्वाचन प्रणाली मिश्रित समानुपाति आधारय् जुइमाःगु खँ ककसं न्ह्यथंगु दु । मिश्रित समानुपाति प्रणाली कथं निसः व न्य्यछम्ह दुजः दुगु प्रतिनिधि सभा जुइमाःगु व उकिइ सच्छि व छम्ह प्रत्यक्ष निर्वाचित व सच्छि व न्यय्म्ह समानुपातिक कथं निर्वाचित जुइमाःगु धाःगु दु ।

निसः व नीगू पेज ताःहाकगु अवधारणापत्रय् सच्छि व न्याम्ह दुजः दुगु राष्ट्रियसभा जुइमाःगु खँ नं दुथ्याकातःगु दु । उगु राष्ट्रिय सभाय् प्रत्येक संघ, राज्य वा प्रदेश, स्वायत्त क्षेत्र व स्थानीय निकायपाखें अनिवार्य छम्ह-छम्ह व राष्ट्रपतिपाखें न्याम्ह मनोनित यायेगु अधिकार दइगु खँ अवधारणा पत्रय् न्ह्यथनातःगु दु ।