आन्दोलन अझ जारी : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल प्रचण्डं जनताया पक्षय् थःपिंसं न्ह्याकूगु आन्दोलन अझ जारी हे दनीगु खँ धयादीगु दु ।
आइतवाः येँय् जूगु छगू ज्याझ्वलय् न्ववासें वयेकलं देशय् क्रान्तिकारी व प्रतिक्रान्तिकारी शक्तित दथुइया संघर्ष तिर्व जूगुलिं नं थःपिनिगु आन्दोलनया सान्दर्भिकता मसिधःगु धयादिल ।
माओवादी जनयुद्धया झ्वलय् घाःपाः जुपिंनि छेँजः पिंसं याःगु ज्याझ्वलय् निवर्तमान प्रधानमन्त्री प्रचण्डं एमाले नेतृत्वया सरकार सहमतिया अधारय् गठन मजुसें गणितिय आधारय् गठन जूगुलिं थ्व तन्हु चलेमजुइगु खँ धयादिल । वयेकलं कांग्रेस-एमाले गठबन्धनया सरकारं प्रतिक्रान्तिकारीतय् नेतृत्व याःगु द्वपं बियादिल । आमुल परिवर्तनया नारा ज्वना सरकारय् वंगु माओवादीयात प्यखेरं घेराबन्दी यानाः जनताया पक्षय् ज्या यायेमब्यूगु धासें अध्यक्ष प्रचण्डं सरकार पिने च्वनां नं माओवादी शान्ति प्रकृया व नागरिक सर्वोच्चताया निंतिं सदन व सतकं आन्दोलन न्ह्याकाःतुं च्वनीगु धयादिल ।
अथेहे थौं हे जूगु मेगू छगू ज्याझ्वलय् न्ववानादीसें वयेकलं माओवादी सरकारय् दुगु ईलय् तसकं मेहेनत यानाः मुंकूगु राष्ट्रिय सम्पत्ति आः न्हूगु सरकारं हाकनं दुरुपयोगु याइगुलिं च्यूताः प्वंकादिल ।
नेपाल राष्ट्रिय उद्योग व्यापार संगठनया न्हापांगु राष्ट्रिय महाधिवेशनया उल्लेज्या यानादिसें वयेकलं राष्ट्रिय सहमतियया निंतिं कांग्रेस सभापति गिरिजाप्रसाद कोइरालां यानादीगु इनाप लसकुसयाय् बह वुसां सहमतिया निंतिं दुनेवनेगु खापाःय् तालं ग्वयेगु व नापनापं विद्युत सहितया तार तयाः गुकथं सहमति जुइ धकाः न्ह्यसः तयादिल ।
वयेकलं माओवादी सत्ता कब्जा यायेत स्वःगु खः तर गुकथं आः हल्ला जूगु खः अथे यानाः मखु धयादिल । माओवादीं मेगू चुनावय् आः स्वयां अप्व मत त्याकाः सत्ता कब्जा यायेगु दाबी यानादिल ।
