'दौरा सुरुवाःयात राष्ट्रिय वसः धकाः सरकारं निर्णय याःगु खः'
सर्वोच्च अदालतं दौरा सुरुवाःयात राष्ट्रिय वसः धकाः निर्णय मयानागु प्रष्ट याःगु दु । अदालतं शुक्रवाः छगू पत्रकार सम्मेलनया ग्वसाःग्वयाः दौरा सुरुवाःयात राष्ट्रिय वसः धकाः अदालतं मखुसें सरकारं निर्णय याःगु व अदालतं उकिया विरुद्ध दायर जूगु रिट जक खारेज यानागु प्रष्ट याःगु दु ।
पत्रकार सम्मेलनय् सर्वोच्चया सह प्रवक्ता हेमन्त रावलं दौरा सुरुवाःयात राष्ट्रिय वसः दयेकेगु सरकारया निर्णय २०६७ भदौ ७ गते राजपत्रय् पिहांवःगु जानकारी बियादिल । दौरा सुरुवाःयात राष्ट्रिय वसः सर्वोच्चं निर्णय धकाः याःगु प्रचारय् थःपिनिगु ध्यानाकर्षण जूगु धासें सर्वोच्चं फैसलाया पूर्ण पाठयात पियाच्वनेत इनाप नापं याःगु दु ।
दौरा सुरुवाःयात राष्ट्रिय वसः दयेकेगु सरकारया निर्णय खारेजया माग याना अधिवक्ता रन्जनकुमार सिंहं दायर याःगु रिट सर्वोच्चं खारेज याःगु खः ।
न्यायाधीत प्रकाश शर्मा, बद्रीबहादुर कार्की व गिरिसचन्द्र लालया मंका इजलासं बहुमतया आधारय् रिट खारेज याःगु खः । न्यायाधीश लालं रिट खारेज यायेमज्यूगु मत तयादीगु खः ।
मधेसवादी दलतय्सं सर्वोच्चया फैसला पुनःर्विचार यायेत प्रधानन्यायाधीश खिलराज रेग्मीयात ज्ञापन पौ लःल्हासें ध्यानाकर्षण नापं यायेधुंकूगु दु ।
