प्रधानमन्त्रीया निंतिं भट्टराई व पौडेलया उम्मेदवारी
बहुमतिय प्रकृयापाखें न्हूम्ह प्रधानमन्त्री ल्ययेगु प्रकृयाया एकीकृत नेकपा (माओवादी) व नेपाली कांग्रेसया नेता मैदानय् कुहांवःगु दु । प्रधानमन्त्रीया उम्मेदवारीया निंतिं माओवादीपाखें पार्टी न्वकु डा. बाबुराम भट्टराई व कांग्रेसपाखें संसदीय दलया नेता रामचन्द्र पौडेलं थःगु मनोनयन शुक्रवाः दर्ता याकूगु दु ।
माओवादी नायः पुष्पकमल दहाल 'प्रचण्ड' सहितया पुचः शुक्रवाः ११:३० बजे सिंहदरवार थ्यंकाः भट्टराईया उम्मेवादरी निर्वाचन अधिकृत संसद सचिवालयया मूछ्याञ्जे मनोहर प्रसाद भट्टराई समक्ष दर्ता याकूगु खः । भट्टराईया उम्मेदवारीइ प्रचण्ड प्रस्तावक व समर्थकय् मेम्ह न्वकु नारायणकाजी श्रेष्ठ 'प्रकाश' व मूछ्याञ्जे रामबहादुर थापा 'बादल' च्वनादीगु खः ।
अथेहे कांग्रेस संसदीय दलया नेता पौडेलं नं थःगु उम्मेदवारी दर्ता यानादीगु दु । वय्कःया उम्मेदवारीया प्रस्तावकय् महामन्त्री प्रकाशमान सिंह व समर्थकमा विमलेन्द्र निधि च्वनादीगु दु ।
कार्यव्यवस्था परामर्श समितिं प्रधानमन्त्रीया उम्मेदवारी दर्ता यायेत बिउगु ईया दुने निम्ह नेतां जक थःगु उम्मेदवारी दर्ता यायेवं आः आइतवाः १ बजे च्वनीगु व्यवस्थापिका संसदया मुँज्याय् निम्ह नेतात दथुइ धेंधेंबल्ला जुइगु जूगु दु ।
