माओवादीयात संयन्त्रय् च्वनेत कोइरालाया इनाप
नेपाली कांग्रेसया सभापति गिरिजाप्रसाद कोइरालां एकीकृत नेकपा (माओवादी)यात सरकार स्वयां च्वये च्वनीगु 'मेकानिजम'य् च्वनेत इनाप यानादीगु खु ।
व्यवस्थापिका संसदय् प्रधानान्त्री पदय् नेकपा (एमाले)या नेता माधव नेपालया नां प्रस्ताव यासें वयेकलं सरकारय् ब्वति मकासां राजनीतिक दलया शीर्ष नेतात दुथ्याइगु 'मेकानिजम'य् च्वनेत कोइरालां इनाप यानादीगु खः । वयेकलं अज्याःगु संयन्त्रय् थः नं च्वनेधु घोषणा यानादिल ।
माधव नेपालयात माओवादी अध्यक्षं बुम्ह मनू धकाः धाःगुलि दुःख प्वंकूसें सभापति कोइरालां सहमति, सहकार्य व एकताया न्ह्यने सुं नं मबूइगु धयादिल । वयेकलं सहमति, सहकार्य व एकताया अधारय् न्ह्या: वनेमाःगु खँय् बः बियादिल । नापं वयेकलं राष्ट्रिय एकता, मेलमिलाप व सहमतिया आधारय् न्ह्याः वनाः शान्ति प्रकृयात निष्कर्षय् थ्यंकेमाःगु बिचाः प्वंकादिल ।
शान्ति प्रकृयाय् माओवादी अध्यक्ष प्रचण्डया तःधंगु योगदान दुगु धासें निष्कर्षय् थ्यंनेत्यंगु ईलय् पिहांवंगुलिं सभापति कोइरालां च्यूताः प्वंकादिल ।
कोइरालां प्रधानमन्त्रीलय् नेपालया नां प्रस्ताव याये न्ह्यः एकीकृत माओवादी संसदीय दलया उपनेता नारायणकाजी श्रेष्ठं राष्ट्रपतिया असंवैधानिक पलाः भिंकेत थःगु दलं संवैधानिक व राजनीतिक कुतः यासां पलाः मंभिकूगुलिं प्रधानमन्त्री निर्वाचनया प्रकृया बहिष्कार यानाःगु घोषणा यानादिल ।
वयेकलं साम्राज्यावादी, विस्तारवादी शक्तिया निर्देशनय् असामान्य तरिकां न्हूगु सरकार निर्माण जुत्यंगु धासें थुकी नकारात्मक लिच्वः लाकीगु धयादल । वयेकलं सैनिक सर्वोच्चताया सरकार मखु, नागरिक सर्वोच्चताया सरकार गठन जुइमाः धइगु माओवादीया इच्छा जूगु धयादिल । नेता श्रेष्ठं संकल्प प्रस्तावय् सहलह यानाः निकास मालेगु ज्या मयासें न्हूगु सरकार गठन प्रकृया ल्ह्वंगु धासें असहमति प्वंकादिल । वयेकलं माओवादीं निर्वाचन प्रकृयाया जक विरोध याःगु तर संसद बहिष्कार मयाःगु नं स्पष्ट यानादिल ।
शनिवाःया बैठकय् नेकपा एकीकृतया सभासद् परि थापां सरकार गठन प्रकृयाय् असहमति प्वंकूसें राष्ट्रपतिं ल्ह्वंगु पलाःया विरोध यानादिल । अथेहे नेपाली जनता दलया सभासद गायत्री साह नं राष्ट्रपतिं थःगु पलाः लित कायेमाःगु माग यानादिल । थापा व साह निम्हेसिनं निवार्चन प्रकृयाय् असहमति प्वंकूसें बैठकं पिहांवंगु खः ।
कोइरालाया प्रस्तावयात समर्थन यासें एमाले अध्यक्ष झलनाथ खनालं माओवादीं निर्वाचन प्रकृयाय् असहमति प्वंकूसां सरकार गठन प्रकृयाय् तःधंगु योगदान या:गुलिं सुभाय् बियादिल । वयेकलं सरकारया नेतृत्व एमालें यासां न्हूगु संविधान निर्माण, शान्ति प्रकृया, राज्य पुर्नसंरचना, आर्थिक क्रान्ति व राष्ट्रिय एकता न्याःगु महत्वपूर्ण जिम्मेवारी पूवंकेगु दायित्व दक्वसियां जूगु धयादिल ।
नेपालया समर्थन यासें फोरम नेता विजयकुमार गच्छेदार, तमलोपाया अध्यक्ष महन्त ठाकुर, सद्भावनाया अध्यक्ष राजेन्द्र महत्व लगायत नेतातय्सं न्ववानादीगु खः ।
