थुगुसीया चित्तधर सिरपाः लःल्हायेज्या
कविकेशरी चित्तधर 'ह्दय'या १०५ दँ बुन्हिया लसताय् नेपालभाषा परिषदं म्हिगः छगू ज्याझ्वःया दथुइ थःपिंसं दँय्दसं बीगु याना वयाच्वंगु थीथी सिरपाः लःल्हात।
ज्याझ्वलय् परिषद्या नायः फणीन्द्ररत्न वज्राचार्यं साहित्यकार चिनियालाल वज्राचार्ययात चित्तधर सिरपाः, मिसा बाखं च्वमि प्रकाश प्रधानांगयात मोतिलक्ष्मी सिरपाः व ध्याचू च्वमि केशरत्न शाक्ययात ठाकुरलाल सिरपाः लःल्हानादीगु खः। मूपाहां भिक्षु ज्ञानपूर्णिक महास्थविरं चित्तरंजन नेपालीयात भाषाथुवाः उपाधिं विभूषित यानाबिज्यात। वय्कःयात छ्यनय् बेतालिं चिकाः सम्मानित याःगु खः ।
चित्तधर सिरपाःया नीन्याद्वः तका मय्जु केशरीलक्ष्मी मानन्धरं व ठाकुरलाल सिरपाःया झिंन्याद्वः तका भाजु गिरिधरलाल मानन्धरं लःल्हानादीगु खः। ज्याझ्वलय् न्ववासें भिक्षु ज्ञानपूर्णिक महास्थविरं थः धार्मिक ख्यःयाम्ह जुयाः सामाजिक ख्यलय् उलि योगदान बी मफुसां चित्तधर 'ह्दय'या प्रेरणां थम्ह बुद्ध धर्मया सफूत नेवाः भासं अनुवाद यानागु खँ कनाबिज्यात ।
चित्तधर सिरपालं विभूषित च्वमि चिनियालाल वज्राचार्यं तानसेनय् नेपालभाषा विकास यायेगु ज्याय् चित्तधर 'ह्दय' व भिक्षु अमृतानन्दया योगदान दुगु खँ कनादिल।
बाखंच्वमि मय्जु प्रकाश प्रधानांगं चित्तधर 'ह्दय' जुं नेपालभाषा विकासया खँय् थुंदीक कनादीगु पुलांखँ लुमंकादिल ।
ध्याचू च्वमि केशरत्न शाक्यं थः च्वसापाखें छुं ई झासुलनाच्वनागु इलय् ठाकुरलाल सिरपाः बिउगुलिं थःत हानं च्वयेगु लागिं उर्जा तना बिउगु खँ कँसें थ्वहे दँय् थःगु व्यंग्य सफू पिथनेगु बचं बियादिल।भाषाथुवाः उपाधिं विभूषित जुयादीम्ह साहित्यकार चित्तरंजन नेपालीं भाषा स्वयां नं साहित्यया ख्यलय् थःपिं अप्वः लगे जुयाच्वनागु कारणं थ्व सम्मानं यानाः थम्हं थःगु हे आत्मालोचना यायेमाःगु अवस्था वयाच्वंगु दु धयादिल ।
परिषद्या नायः फणीन्द्ररत्न वज्राचार्यया सभापतित्वय् जूगु उगु ज्याझ्वलय् परिषद्या छ्यांज्ये अष्टमुनि वज्राचार्यं लसकुस यानादीगु खः। उगु हे ज्याझ्वलय् उकुन्हु तिनि काठमाडौं विश्वविद्यालयपाखें महाविद्यावारिधि उपाधिपाखें सम्मानित जुयादीम्ह ज्याथम्ह लोकसाहित्यविद् लिसें नेपालाभाषा एकेदमिया चान्सलर सत्यमोहन जोशीयात नं हनेगु ज्या जूगु खः ।
