अन्नाया समर्थनय् येँय् नं र्याली
येँ (सन्ध्या टाइम्स)/भारतय् भ्रष्टाचार विरोधी आन्दोलनया नेतृत्व यासें आमरण अनसन च्वनाच्वंम्ह अन्ना हजारेया समर्थनय् थौं येँय् नं छगू र्याली पिहां वःगु दु। नेपालय् दुपिं भारतीय नागरिकतय्सं येँय् अन्नाया समर्थनय् उगु र्याली पिकाःगु खः। येँया बसन्तपुलिं पिकाःगु उगु र्याली रत्नपार्क, जमल, केशरमहल जुयाः लैनचौरय् च्वंगु भारतीय दूतावासय् थ्यंकाः ज्ञापन पौ बीगु ज्या याःगु खः ।
ज्ञापनपती अन्ना हजारेया भ्रष्टाचार विरोधी अभियानयात समर्थन यासें वय्कलं माग याः थें लोकपाल विधेयक पारित यायेत माग यानातःगु दु। इन्डियन सिटीजन एसोसिएसन अफ नेपालया ग्वसालय् उगु र्याली पिहां वःगु खः। र्यालीइ ब्वति काःपिं भारतीय नागरिकतय्सं नेपाःया राष्ट्रिय ध्वाँय् नापं भारतया राष्ट्रिय ध्वाँय् नं ज्वना वंगु खः ।
भारतया राजधानी न्हूदिल्लीइ अन्ना हजारें अनसन सुरु यानादीगु थौं झिन्हु क्यन। वय्कःया ब्लड प्रेसर म्हो जुया वनाच्वंगु खँ धाःगु दु ।
