होटलया क्वथाय् मिसा स्यानाः मिजं बेपत्ता

येँ (सन्ध्या टाइम्स)/कैलालीया मसुरिया लागाया कन्काई होटलय् म्हिगः बहनी छम्ह मिजनं थः कलाः धकाः हःम्ह छम्ह मिसायात स्यानाः बिसिउँ वंगु दु। मोटरसाइकलय् वयाः होटलय् च्वंम्ह उम्ह मिजनं थौं सुथ न्हापां बिलया ध्यबा पुलाः वंगु इलय् होटल मालिकयात शंका लुयाः कलाः ग्व धकाः न्यंगु नं खः। मिजनं ध्यबा पुलाः वनेवं शंका यानाः क्वथाय् स्वःवंगु इलय् मिसायात स्यानातःगु अवस्थाय् लुयावःगु खः। २ नम्बर क्वथाय् मिसायात गःपतय् खिपतं चिनाः म्ह छम्हं हिया हि जुइक स्यानातःगु खः। मिसाया नांगांगु लाशयात सिलखं भुनाः र्‍याकय् तया तःगु अवस्थाय् लुइकूगु खः। प्रहरीं लाशया सनाखत याये फयाच्वंगु मदुसा मिसायात स्याना वंम्ह मिजं सु धकाः नं सीके फयाच्वंगु मदु ।

थ्वहे झ्वलय् मेखे पोखराय् थौं सुथय् छम्ह मिसायात स्यानातःगु अवस्थाय् लुइकूगु दु। पोखराया प्रतिभा त्वाःया लक्ष्मी परियारयात स्यानातःगु अवस्थाय् लुइकूगु खः। ४० दँ दुम्ह परियायात सुनां छाय् स्यात धइगु बारे धाःसा छुं सीके मफुनि ।