माधव नेपाल न्हूम्ह प्रधानमन्त्री
नेकपा (एमाले)या वरिष्ठ नेता माधवकुमार नेपाल निर्विरोध रुपं प्रधानमन्त्री जुयादीगु दु । व्यवस्थापिका संसदया शनिवाः च्वंगु बैठकं नेता नेपालयात निर्विरोध रुपं प्रधानमन्त्री ल्यःगु खः ।
संविधानसभाय् दुथ्याःगु नीनिगू दलतय् समर्थनय् नेता नेपाल प्रधानमन्त्री जुयादीगु खः । व्यवस्थापिका संसदया शनिवाःया बैठकय् नेपाली कांग्रेसया सभापति गिरिजाप्रसाद कोइराला व वरिष्ठ नेता शेरबहादुर देउवाया प्रस्ताव व एमाले अध्यक्ष झलनाथ खनाल सहित निम्ह स्वतन्त्र सभासद व नीनिगू दलया प्रतिनिधितय्सं नेता नेपालयात समर्थन याःगु खः ।
व्यवस्थापिका संसदया बैठक शुरु जुइवं एकीकृत नेकपा (माओवादी), नेकपा (एकीकृत) व नेपाली जनता दलया सभासदतय्सं थःथःगु बीचाः प्वंकाः निर्वाचन प्रकृया बहिष्कार याःगु खः । नेता नेपालया विपक्षय् च्वंपिं स्वंगुलिं पार्टीं प्रधानमन्त्रीया निंतिं थःगु पार्टी पाखें सुं नं उम्मेदवारया नां दर्ता मयासें निर्वाचन बहिष्कार यायेगु घोषणा यायेवं व्यवस्थापिका संसदया बैठकं एमाले नेता नेपालया निर्विरोध प्रधानमन्त्री चयन याःगु खः ।
