समाजसेवी रत्न नारायण साय्मि मंत
येँ (सन्ध्या टाइम्स)/केन्द्रीय मानन्धर संघया उपसभापति लिसें डल्लुया सामुदायिक स्वास्थ्य परिषद्या नायः रत्ननारायण 'न्हूजवाः' साय्मि थौं सुथय् आकाझाकां मंत। समाजसेवाया ज्याय् अतिकं सक्रियम्ह वय्कः सामान्य विरामी लिपा थौं सुथय् ४ बजे मदुगु खः। वय्कःया स्वँलाय् लः जाःगु खँ चिकित्सकतय्सं धाःगु दु ।
मदुम्ह साय्मिया जहान लिसें निम्ह कायपिं दी। वय्कःया सीम्ह डल्लुया स्वास्थ्य परिषद्य् अन्तिम श्रद्धांजलिया लागिं तयाः अनं वय्कःया छेँ क्वं तुं कंग तक सिथं यंकूगु खः। कंगय् वय्कःया मिखा दान नं याःगु दु। वय्कः डल्लुया स्वास्थ्य परिषद्यात अस्पताल दयेकेगु व केन्द्रीय केन्द्रीय मानन्धर संघयात अझ सक्रिय यायेगु ज्याय् सक्रिय रुपं लगे जुयाच्वंम्ह खः ।
