शान्ति, संविधान व सरकार निर्माण बारे माओवादीया प्रस्ताव
एकीकृत नेकपा (माओवादीं) थःगु नेतृत्वय् सरकार गठन यायेत ‘शान्ति, संविधान व सहमतीय सरकारया निंतिं माओवादीया अवधारणा तथा प्रतिवद्धता' न्ह्यब्वःगु दु ।
माओवादी स्थायी समिति मुँज्या लिपा बिहीवाः पार्टी मू ज्याकू पेरिस डाँडा कोटेश्वरय् छगू पत्रकार सम्मेलन यानाः माओवादी नायः पुष्पकमल दाहाल 'प्रचण्डं' पार्टीया अवधारणा नापं प्रतिबद्धता न्ह्यब्वयादीगु खः । उगु प्रतिबद्धताय् थःगु नेतृत्वय् सहमतिय सरकार गठन यानाः लडाकु व ल्वाभःया कन्टेनरया ताःचा विशेष समितियात लःल्हायेगु खँ न्ह्यथंगु दु ।
माओवादीं नेपाली सेनाया मातहातय् महानिर्देशनालय गठन यानाः लत्याःया दुने सेना समायोजन यायेगु, तुरुन्त पुनवर्गिकरण सुरु यानाः लच्छिया दुने क्वचायेकेगु धाःगु दु । अथेहे च्याद्वः लडाकुत समायोजन यायेगु, पार्टी केन्द्रीय दुजः स्वयां च्वयेया कमाण्डरतय्त राजनीतिइ हयेगु, मेपिं कमाण्डरतय् दर्जा मिलानया निंतिं बिशेषज्ञया पुचः दयेकेगु, समायोजन यायेगु इलय् सेनाया भौतिक स्वास्थ्य सम्बन्धी मापदण्ड कथं कायेगु, उमेर, विवाह शिक्षालगायतय् धाःसा बिशेष मापदण्ड नालाकायेगु व पुनःस्थापना जुइपिं लडाकूतय्त न्हय्द्वः निसें झिद्वः तका बियाः बिढाई यायेगु खँ अवधारणा हे न्ह्यथंगु दु ।
संविधान निर्माणया निंतिं खुला थप यायेमाःगु धासें माओवादीं लत्याःया दुने संविधानया मस्यौदा तयार यायेगु खाका न्ह्यब्वःगु दु । अथेहे सरकार गठनया निंतिं बहुमतिय प्रकृयाय् वंसां बहुमतिय दुने नं सहमतिय सरकार गठन यायेत कुतः यायेगु, मन्त्रालय बाँडफाँड सहमतिया आधारय् यायेगु व सरकार सञ्चालनया निंतिं उच्चस्तरिय राजनीतिक संयन्त्र दयेकीगु खँ न्ह्यथंगु दु ।
अथेहे माओवादीं सत्य तथा मेलमिलाप निरुपण आयोग नीस्वनेगु, बृहत शान्ति सम्झौता, मधेसलगायत नाप जूगु सहमतित पूवंकेत कार्यतालिका दयेकाः ज्या न्ह्याकेगु अवधारणा नं न्ह्यब्वःगु दु ।
