दौरा सुरूवाः प्रकरण : गृहमन्त्रालयया निर्देशन प्रति मोर्चाया आपत्ति
दौरा सुरूवाः च्याकीगु बारे जानकारी मदु : गृहमन्त्री
संयुत्त लोकतान्त्रिक मधेशी मोर्चां दौरा सुरूवाः चायेकेत्यंगु धासें गृहमन्त्रालयं उकियात पनेत बिउगु निर्देशन प्रति मोर्चां आपत्ति प्वंकूगु दु ।
बिहीवाः च्वंगु व्यवस्थापिका संसदया मुँज्याय् मधेशवादी नेतातय्सं मोर्चायात बदनाम यायेत गृह मन्त्रालयं अज्याःगु निर्देशन बिउगु धासें गृहमन्त्रीं उकिया लिसः बिइमाःगु माग याःगु खः । मधेसी नेतात विजय गच्छदार, महन्थ ठाकुर, जयप्रकाश गुप्ता, राजेन्द्र महतो व महेन्द्र राय यादवं थःपिंसं सर्वोच्चया फैसला जक च्याकेगु धकाः यानागु निर्णययात गृह मन्त्रालयं गलत वाख्या याःगु खँ न्ह्यथंगु खः ।
मधेशी नेतातय्सं गृहमन्त्रीपाखें लिसः बिइमाःगु माग तयाः संसद अवरूद्ध यायेवं गृहमन्त्री नारायणाकाजी श्रेष्ठ 'प्रकाशं' थौं हे संसदय् सम्बोधन यानादीगु खः । गृहमन्त्री प्रकाशं दौरा सुरूवाः चायेकेगु बारे सरकारयात जानकारी मदुगु दावी यानादिल । वय्कलं थौंया राष्ट्रिय न्हिपौपतिइ पिहांवःगु बुखँ प्रति सरकारया ध्यानाकर्षण जूगु न्ह्यथनादिसें सरकारं नेपाःया फुक्कं भाषा, धर्म व भेषाभूषायात सम्मान यायेगु धयादिल ।
