प्रधानमन्त्रीया निर्वाचन आइतवाः जुइगु
सहमतिय सरकार गठन यायेत राजनीतिक दलत असफल जुइवं आः बहुमतिय आधारय् प्रधानमन्त्री ल्ययेत आइतवाः व्यवस्थापिका संसदय् निर्वाचन जुइगु जूगु दु ।
सभामुख सभाषचन्द्र नेम्वाङया अध्यक्षताय् बिहीवाः सुथय् च्वंगु कार्यव्यवस्था परामर्श समितिया मुँज्यां प्रधानमन्त्रीया निर्वाचन आइतवाः भदौ ११ गते १ बजे यायेगु निर्णय याःगु खः । निर्वाचनय् ब्वति काइपिं उम्मेदवारतय् मनोनयन दर्ता यायेत शुक्रवाः ५ बजे तक ई बिउगु दुसाः उम्मेदवारतय् लिप्पांगु नां धलः कन्हय् हे प्रकाशन याइ ।
बहुमतिय सरकार गठन यायेगु प्रक्रिया न्ह्याकेत राष्ट्रपति डा. रामवरण यादवं अन्तरिम संविधानया धारा ३८या उपधारा (२) अन्तर्गत व्यवस्थापिका संसदयात बुधवाः पौ छ्वःगु दु । आः तक बहुमतिय आधारय् प्रधानमन्त्रीया उम्मेदवार कथं माओवादीपाखें डा. बाबुराम भट्टराई व कांग्रेसपाखें रामचन्द्र पौडेलया नां न्ह्यःने वयाच्वंगु दु ।
अथेहे थौंया कार्यव्यवस्था समितिया मुँज्यां सरकारं संविधानसभाया म्याद थप यायेत दर्ता याःगु संविधान संशोधनया विधेयकय् भदौ १२ गते सहलह यायेगु व १३ गतेया दुने क्वचायेकेगु कार्यतालिका न्ह्यब्वःगु दु ।
