राष्ट्रपतिं बहुमतिय सरकार गठन यायेत संसदयात पौ
राष्ट्रपति डा. रामवरण यादवं सहमतिय सरकार गठन यायेत बिउगु ई क्वचायेवं बहुमतिय सरकार गठन यायेत संसदयात पौ छ्वःगु दु ।
थप याःगु इलय् नं राजनीतिक दलतय्सं सहमतिय सरकार गठन यायेमफेवं राष्ट्रपति यादवं अन्तरिम संविधानया धारा ३८ या उपदफा (२) कथं संसदया बहुमतपाखें प्रधानमन्त्री निर्वाचित यायेत संसदयात पौ छ्वःगु खः ।
बहुमतिय प्रधानमन्त्री ल्ययेगु बारे सहलह यायेत सभामुख सुभाषचन्द्र नेम्वाङं कन्हय् सुथय् कार्यव्यवस्था परामर्श समितिया मुँज्या आव्हान यानादीगु दु । कार्यव्यवस्था परामर्श समितिया मुँज्या लिपा च्वनीगु व्यवस्थापिका संसदया मुँज्याय् प्रधानमन्त्री ल्ययेगु प्रक्रिया न्ह्याइ । बहुमतिय प्रधानमन्त्री ल्ययेत संसदय् तत्काल कायम जूगु फुक्कं दुजःया बहुमतया आधारय् प्रधानमन्त्री निर्वाचित जुइगु व्यवस्था दु ।
थ्वस्वयां न्ह्यः राष्ट्रपति यादवं सहमतिय सरकार गठन यायेत साउन ३० गते छवाःया ई बियादीगु खः । छवाः दुने सहमतिय सरकार गठन यायेमफेवं राजनीतिक दलतय् इनापय् राष्ट्रपतिं सरकार गठन यायेगु म्याद हानं स्वन्हु थप यानादीगु खः ।
