माओवादीं शान्ति प्रक्रियाया ठोस प्रस्ताव हइगु
एकीकृत नेकपा (माओवादीं) कन्हय् शान्ति प्रक्रिया ठोस प्रस्ताव हइगु जूगु दु । माओवादी नेतृत्वय् सरकार गठन यायेत चिधंगु दलतय्सं शर्त न्ह्यब्वयेवं माओवादीं शान्ति प्रक्रिया क्वचायेकेगु ठोस प्रस्ताव न्ह्यब्वयेगु निर्णय याःगु खः ।
माओवादीया थौ च्वंगु पदाधिकारीतय् मुँज्याय् पार्टी नायः पुष्पकमल दाहाल 'प्रचण्डं' सेना समायोजन यायेगु बारे प्रस्ताव न्ह्यब्वयादीगु खः । वय्कलं पार्टीं न्हापा कयाच्वंगु अडान त्वःता च्याद्वः जक लडाकू समायोजन यायेगु प्रस्ताव तःगु खः । न्हापा माओवादीं च्याद्वः निसें झिद्वः तक लडाकू समायोजन यायेमाःगु खँ धयाच्वंगु खः ।
अथेहे प्रचण्डं समाजय् पुनःस्थापना जुइपिं लडाकूतय्त न्हय्गू निसें झिगू लख बियाः बिदाई यायेगु प्रस्ताव न्ह्यब्वयादीगु खः । पदाधिकारीतय् मुँज्याय् उगु प्रस्तावय् सहमति मजुइवं ठोस निर्णय यायेत माओवादीं कन्हय् स्थायी समितिया मुँज्या आव्हान याःगु दु ।
स्थायी समिति मुँज्यां शान्ति प्रक्रियाया बारे ठोस प्रस्ताव हइगु व उगु हे प्रस्तावया आधारय् थःगु नेतृत्वया सरकार गठन यायेगु योजना माओवादीं दयेकूगु दु ।
