यलया चर्चय् बम विष्फोट, निम्ह सित, झिंस्वम्ह घाःपाः
येँय् गोली चले जुया निम्ह सित
यलया धोविघाटय् च्वंगु चर्चय् शनिवाः सुथय् बम विष्फोट जुयाः निम्ह सीगु दु । अथेहे घटनय् लाना: झिंस्वम्ह घाःपाः जूगु दु ।
प्रहरीया कथं लेडिज ब्यागय् तयातःगु बम गुताःत्याः ईलय् चर्च दुने हे विष्फोट जूगु खः । विष्फोटय् घाःपाः जुया वासः याकेगु झ्वलय् भारत पटनाया झिंन्यादँया सिसिलिया जोसेफ व स्वीदँया दीपा प्याटरिक पाटन अस्पतालय् सीगु दु । घाःपाः जुपिंतः जाउलाखेलय् च्वंगु अल्का अस्पताल व पाटन अस्पतालय् वासः याकात:गु दु । घाःपाः जुपिं मध्ये न्याम्हेसिया अवस्था गम्भीर दुगु खँ प्रहरीं धा:गु दु ।
घटनाया जिम्मेवारी डिफेन्स आर्मी नांगु संस्थां काःगु दु ।
अथेहे म्हिग बहनी येँया धापासीइ प्रहरी नाप जूगु मुठभेडय् लानाः निम्ह सीगु दु । दोलखा वनेत्यंगु प्रहरी नायव उपरीक्षक शेरबहादुर वस्नेतया पुचः सवार जिपय् निगः मोटरसाइकलय् च्वनाःविपंसं गोली केयेकेवं प्रहरीया जवाफी कारवाही लानाः निम्ह सीगु खँ प्रहरीं धाःगु दु । प्रहरी पुचःलं मोटरसाइकल गयाः वपिं नाप न्यनेकने यायेत स्वःवलय् उमिसं गोली चलेयाःगु खँ प्रहरीं धाःगु दु ।
घटनाय् लानाः सुनसरीया सुजित तामाङ व सर्लाही छेँय् जुयाः महाराजगंजय् च्वनीम्ह रमेश साह सीगु खः । प्रहरीं घटनास्थलं छपू कटुवा पेस्तोल व बा. २८. प. ८३५२ नम्बरया मोटरसाइकल बरामद याःगु दु ।
