माओवादी व मधेसी मोर्चा नापं जायेवं...

येँ (सन्ध्या टाइम्स)/वर्तमान कामचलाउ सरकारय् दुथ्याःगु झिगू दलया बैठकय् संविधानसभाया म्याद खुला थप यायेगु प्रस्तावय् सहमति जूसां नं प्रधानमन्त्री झलनाथ खनालं म्हिगः सर्वदलीय बैठकय् स्वलाया जक म्याद थप यायेगु प्रस्ताव तयादीगुया मू कारण धइगु एकीकृत माओवादीया नेतृत्वय् सरकार दयेकीगु अवस्था ब्वलंगुलिं खयेमाः धाःगु दु। माओवादी व मधेसवादी दलत जानाः माओवादी उपाध्यक्ष डा. बाबुराम भट्टराईया नेतृत्वय् बहुमतया सरकार दयेकीगु अवस्था ब्वलनेवं हे न्हूगु सरकारयात ताः ई तया मतयेगु नितिं उज्वःगु खेल सुरु जूगु खयेमाः धकाः अनुमान यानाहःगु दु। प्रधानमन्त्री झलनाथ खनाल स्वयं हे उपस्थित जूगु सत्तारुढ दलतय्गु बैठक सुथय् च्वंगु इलय् संविधान निर्माणया निंतिं स्वलां गाइ मखु धकाः मधेसी जनअधिकार फोरमपाखें गुला म्याद थप यायेगु प्रस्ताव तःगु खः। माओवादीपाखें खुला जक थपे योगु प्रस्ताव तःगु खःसा एमाले लगायत मेगु दलतय्सं उकियात हे समर्थन यासें खुला म्याद थप यायेगु धकाः सहमति जूगु खः। तर लिपा कांग्रेस उपस्थित मजूगु सर्वदलीय बैठकय् धाःसा प्रधानमन्त्री खनालं स्वला जक म्याद थप यायेगु प्रस्ताव तयादिल। प्रमं अज्याःगु प्रस्ताव तयेवं माओवादी नेतात बैठक त्वःताः पिहां वःगु खः। अनं लिपा प्रधानमन्त्री खनालं मन्त्रिपरिषद्या बैठक सःतादीगु खःसा उगु बैठकयात नं माओवादी मन्त्रीतय्सं बहिष्कार यायेवं उपप्रधान नापं अर्थमन्त्री भरतमोहन अधिकारीया नेतृत्वय् व्यवस्थापिका संसदय् अन्तरिम संविधान संशोधन यानाः स्वलाया म्याद थप यायेगु प्रस्ताव दर्ता याःगु खः ।