अन्तिम ईया अन्तिम बैठकय् नेतात व्यस्त

येँ (सन्ध्या टाइम्स)/सहमतीय सरकार गठनया निंतिं अन्तिम इलय् वयाः संविधानसभाय् दुथ्याःगु दलया नेतात थःथःगु रणनीति दयेकेगु निंतिं बैठकय् ब्यस्त जुयादीगु दु। एकीकृत माओवादीया केन्द्रीय पदाधिकारीया बैठक च्वंगु दु। उगु बैठकं पार्टीया भावी रणनीति दयेकी धाःगु दु। विशेष यानाः सहमतीय सरकार दयेकेगु अवस्था मदया वनाच्वंगु इलय् बहुमतीय सरकार दयेकेगु नितिं माःगु तयारी यायेत अथे बैठक च्वंगु खः। अथे हे नेपाली कांग्रेसया नेतात नं बहुमतीय प्रणालीइ वनीगु अवस्थाय् गुगु कथं भूमिका म्हितेगु धइगु विषयय् थौं सुथंनिसें अनौपचारिक रुपं सहलह ब्याकाच्वंगु दु। थ्व हे झ्वलय् थौं एमालें संसदय् दुथ्याःगु चिचीधंगु दलत राप्रपा, राजपा, राप्रपा नेपाल, राष्ट्रिय जनमोर्चा, परिवार दल नापं मेमेगु दलया नेतातलिसे नं सहलह ब्याकूगु दु। उगु हे कथं एमालें नं थौं हे संसदीय दलया बैठक सःतूगु दु। बहुमतीय प्रणाली कथं सरकार दयेकीगु अवस्थाय् थःपिंसं छु गुज्वःगु भुमिका म्हितेगु धकाः सहलह ब्याकेत उगु बैठक सःतूगु खः धाःगु दु ।