थुगुसी सभागृहय् ख्यालिन्हिलि ज्याझ्वः

गुंपुन्हि ला सिधल तर गुंपुन्हिया लसताय् ख्यालिगुलु गुथिपाखें दँय्दसं न्ह्यब्वया वयाच्वंगु ख्यालिन्हिलि ज्याझ्वः धाःसा थुपालय् यंलां तिनि क्यनीगु जूगु दु। तर थुगुसी गुथिपाखें क्यनीगु थ्व ज्याझ्वः न्हापा न्हापा थें चेम्बर वा पर्यटन बोर्डय् मखुसें राष्ट्रिय सभागृहया हलय् क्यनीगु जूगु दु। व नं टिकट शोया रुपय् ।

नेपालभाषाया ख्यालः ज्याझ्वः दबुली टिकट शो कथं मजूगु ताः ई हे दत। उकियात हे ताः तयाः थुगुसी ख्यालिगुलु गुथिं तःधंगु दबुली थ्व ज्याझ्वः यायेत्यनागु खँ उकिया नायः गणेशराम लाछिं कनादीगु दु। थ्वहे वइगु यंगाला नवमि (असोज ४ गते) बुधवाः कुन्हु राष्ट्रिय सभागृहय् थ्व ज्याझ्वः यायेगु निर्णय आः नकतिनि गुथिं याःगु खः ।

खतुं थौंकन्हय् गुंपुन्हि वल कि थीथी खस नेपाली भाय्या थीथी पुचःतय्सं सभागृह, प्रज्ञा प्रतिष्ठान थेंज्याःगु थासय् दँय्दसं हे ख्यालः ज्याझ्वः याना वःगु नेवाःतय्गु ख्यालः परम्परा स्वयाः हे खः। तर खस नेपाली भाषाय् थज्याःगु ज्याझ्वः दँय्दसं हे क्यनेगु याना वयाच्वंगु दुसां स्वयम् नेवाःतय्गु ख्यालः परम्परा धाःसा थौंकन्हय् त्वाःदलाच्वंगु दु। छगू इलय् मुनासः नांगु संस्थां ख्यालः कासा याइबलय् टिकट ब्लाय्कं मीमाःगु घटना आः झीगु लागिं 'पुलां बाखं' जुइधुंकल ।

नेवाःतय्सं सुरु याःगु थ्व परम्पराया नक्कल यानाः खस नेपाली भासं गुंपुन्हिया बजाः कयाच्वंगु इलय् नं नेवाःतय्सं धाःसा थौंकन्हय् गुंपुन्हिबलय् नं छुं याये फयाच्वंगु मदु। उकिं दँय्दसं गबलें चेम्बर भवन व गबलें पर्यटन बोर्डया चिकूगु हलय् याना वयाच्वंगु थ्व ज्याझ्वः थुगुसी सभागृहय् क्यनेगु ताः तःगु खः ।

थुगुसी क्यनीगु ज्याझ्वलय् न्यापुनिसें खुपु ख्यालः दइगु खँ ग्वसाः खलकं धाःगु दु। श्यामसुन्दर शिल्पकार, अर्णेश्वरी शिल्पकार, अन्नपुर्णेश्वरी श्रेष्ठ, हरिमान दिवाकर, रामकृष्ण खड्गी, सुरेन्द्र मानन्धर, भोगेन्द्र मानन्धर, भिमसेन रिसाल, सुनिता ठाकुर, इमेज च्यानलया ख्वताबजि पुचः, समय्बजि पुचःया कलाकारतय् ख्यालः, भिंतुना जोशी आदिपिनि हुलाप्याखं नापं जादू, प्यारोडी नं दुथ्याइगु खँ सीदुगु दु ।

सछि, निसः व न्यासः तकाया टिकट मू तयाः याकनं हे बजारय् पिहां वयेत्यनागु खँ कँसें गुथिया नायः लाछिं न्हापा न्हापा क्यना वयाच्वनागु ज्याझ्वःयात यक्वस्यां ययेकूगु कारणं थुगुसीया ज्याझ्वः तःजिक सफल जुइगु आशा प्वंकादीगु दु। वय्कलं थपे यानाः धयादी, 'कलाकारतय्सं नं न्हापा स्वयां यक्व मेहनत यानाच्वंगु दु ।'