चलखं ल्हानाः छखा हे छेँया स्वम्ह सित

येँ (सन्ध्या टाइम्स)/जाजरकोटया भगवती गाविस वडा नं. ३ या अवलगुर्ताय् वंगु चान्हय् चलखं ल्हानाः छखा हे छेँया स्वम्ह मनू सीगु दुसा छम्ह मिसा मचा घाःपाः जूगु दु। उकी लानाः ५५ दँ दुम्ह देवकली परियार, वय्कःया खुदँ दुम्ह काय रमेश व प्यदँ दुम्ह रेशम परियार सीगु खः। दत्या तिनि दुम्ह मनिषा धाःसा गम्भीर रुपं घाःपाः जूगु खँ प्रहरीं धाःगु दु। चलखं ल्हानाः उगु लागाया न्याखा छेँ दुनावंगु खः। घटनास्थलय् उद्धारया नितिं प्रहरी थ्यनेधुंकूगु दु ।