आदिवासी जनजातिय्सं नं अनिवार्य दौरा सुरुवाःया विरोध
सरकारं औपचारिक ज्याझ्वलय् अनिवार्य रुपं दौरा सुरुवाः पुनेत बिउगु निर्देशन व वयात सर्वोच्च अदालतं सदर याःगु फैसलाया खँय् नेपाल आदिवासी जनजाति महासंघं थःगु ध्यानाकर्षण जूगु खँ धाःगु दु ।
महासंघं मंगलवाः छगू पत्रकार सम्मेलना यानाः सरकार व सर्वोच्चया निर्णय नेपाः थीथी जनजातितय् भावना अःख जूगु खँ न्ह्यःथंगु दु । पत्रकार सम्मेलनय् महासंघया नायः राजकुमार लेखीं नेपाः बहुभाषिक, बहुजातिय व बहुसांस्कृतिक देय् जूगुलिं देय्या थीथी जाति समुदायया वासःयात राष्ट्रिय वासः धकाः घोषणा यायेमाःगु माग यानादिल ।
उखे, संयुक्त लोकतान्त्रिक मधेशी मोर्चां सर्वोच्चया उगु फैसलायात पुनःबिचाः यायेत प्रधानन्यायाधीश खिलराज रेग्मीया ध्यानाकर्षण याःगु दु । मोर्चानाप आवद्ध न्यागू मधेशवादी पार्टीया नेतात मंगलवाः सुथय् सर्वोच्च वनाः प्रधानन्याधीशया फैसला पुनःबिचाः यायेत ज्ञापनपौ लःल्हाःगु खः । प्रधानन्यायाधीश रेग्मीं उगु फैसलाया पूर्ण पाठ थःम्ह मब्वनानीगु धयादिसें छुं ई पिइत मधेशवादी नेतातय्त इनाप यानादिल ।
