माओवादीपाखें सर्वदलीय व मन्त्रिपरिषदया मुँज्या बहिष्कार
संविधानसभाया म्याद थपया विषयलय् सहलह यायेत प्रधानमन्त्री झलनाथ खनालं आव्हान यानादीगु सर्वदलीय मुँज्या व मन्त्रिपरिषदया मुँज्या सत्तारुढ एनेकपा (माओवादीं) बहिष्कार याःगु दु । संविधानसभाया म्याद थप यायेगु विषयलय् खँ मिलेमजुइवं माओवादीं निगूलिं मुँज्या बहिष्कार याःगु खः ।
वस्वयां न्ह्यः सुथय् सत्तारुढ व सरकार समर्थित झिगू दलया मुँज्याय् माओवादीं संविधानसभाया म्याद गुला थप यायेमाःगु प्रस्ताव याःगु खःसां सहलह लिपा खुला थप यायेगु खँय् सहमति जूगु खः । तर प्रधानमन्त्री झलनाथ खनालं सत्तारुढ व सरकार समर्थित दलतय् प्रस्ताव अःख सर्वदलीय मुँज्याय् संविधानसभाया म्याद स्वला जक थप यायेगु प्रस्ताव तयेवं माओवादीं सर्वदलीय मुँज्या बहिष्कार याःगु खः । उगु मुँज्याय् कांग्रेसया नेतातय् धाःसा ब्वति मदुगु खः ।
अथेहे सर्वदलीय मुँज्या लिपा च्वंगु मन्त्रिपरिषदया मुँज्याय् नं प्रधानमन्त्री खनालं संविधानसभाया म्याद स्वाल जक थप यायेगु प्रस्ताव यायेवं माओवादीं उगु मुँज्या नं बहिष्कार याःगु खः ।
