युथ फोर्सया नेतातय् अभिव्यत्ति बारे एमालें छानबिन याइगु
नेकपा (एमाले)या भातृ संगठन युथ फोर्सया जिम्मेवार नेता व कार्यकतातय्सं संचार माध्यम व पत्रकारत विरुद्ध बिउगु अभिव्यत्ति बारे एमालें छानबिन याइगु जूगु दु ।
एमालेया सोमवाः च्वंगु केन्द्रीय कमिटीया मुँज्यां छुं ई न्ह्यः मोरङ्ग लगायत थासय् युथ फोर्सया नामय् जूगु घटना व उगु घटनायात कयाः थीथी संचार माध्यमय् पार्टी कार्यकर्तातय्सं बिउगु अभिव्यक्तिया विषयलय् छानबिन यायेत समिति नीस्वंगु दु ।
थीथी घटनायात कयाः केन्द्रीय अनुशासन आयोगं केन्द्रीय कमिटीयात याःगु ध्यानाकर्षणया आधारय् पार्टी न्वकु अशोक राईया संयोजकत्वय् समिति नीस्वंगु खः । थीथी घटना व अभिव्यक्तिया छानबिन यानाः प्रतिवेदन न्ह्यब्वयेगु जिम्मा उगु समितियात बिउगु दु ।
अथेहे केन्द्रीय मुँज्यां शान्ति, संविधान व राष्ट्रिय सहमतिय सरकार गठन यायेत थीथी राजनीतिक दलतनाप पार्टीया पाखें सहलहयात तीव्रता बिइगु निर्णय नं याःगु दु ।
