संसदय् दौरा सुरुवाःया विरोध
सर्वोच्च अदालतं औपचारिक ज्याझ्वलय् राष्ट्रिय वसः कथं दौरा सुरुवा पुनेमाः धकाः याःगु निर्णयाया व्यवस्थापिका संसदय् विरोध जूगु दु । संसदय् समावेशीय नेपाःया परिकल्पना जुयाच्वंगु इलय् सर्वोच्चं याःगु निर्णय अन्तरिम संविधान अःख जूगु धासें उगु निर्णय खारेज यायेत माग याःगु दु ।
नेकपा (एमाले)या सभासद् गोपल ठाकुरं हिलावंगु राजनीतिक अवस्थाय् नं न्हापागु हे सोच कथं दौरा सुरुवाःयात जक राष्ट्रिय वसः धकाः व्याख्या यायेत स्वःगु धासें विरोध यानादिल । आःया इलय् सर्वोच्चया फौसला उचित मजूगु दावी नं वय्कलं यानादिल ।
उखे एमाले समर्थित लोकतान्त्रिक मधेसी संगठनं नं सर्वोच्चया निर्णयया विरोध याःगु दु । संगठनं थौं छगू पत्रकार सम्मेलन यानाः बहुसांस्कृतिक समाजय् सर्वोच्चं छगू जक जाति विशेषया वसःयात नेपाःया राष्ट्रिय वसः कथं याःगु निर्णय प्रति आपत्ति प्वंकूगु खः ।
लुमंकेबहःजू, वंगु साउन ३२ गते सरकारं बिउगु निर्देशनया हे लिधंसाय् सर्वोच्चं भदौ १ गते सरकारी सभा व समारोहय् सरकारी कर्मचारीतय्सं अनिवार्य रुपं दौरा सुरुवा पुनेमाःगु निर्णय याःगु खः ।
