द्वैध सत्ताया आभास जुगुलिं राजीनामा : प्रचण्ड
नेकपा माओवादीया अध्यक्ष व काम चलाउ सरकारया प्रधानमन्त्री पुष्पकमल दाहाल प्रचण्डं देशय् द्वैध सत्ताया अभास जूगुलिं थम्हं प्रधानमन्त्रीया पदं राजीनामा बियागु खँ धयादीगु दु ।
शुक्रवाः व्यवस्थापिका संसदय् सम्बोधन यायेगु झ्वलय् वयेकलं माओवादी अल्मतय् लाःगुलिं सरकारं राजीनामा मयानाःगु स्पष्ट यासें राष्ट्रपति डा. रामवरण यादवं द्वैध सत्ता संचालन यायेत स्वःगुलिं थःगु पदं राजीनामा यानाःगु खँ धयादिगु दु ।
वयेकलं सरकारं बरखास्त याःगु प्रधानसेनापतियात पदय् च्वनाच्वनेत राष्ट्रपतिं आदेश बियाः द्वैध सत्ता संचालन यानाः नागरिक सर्वोच्चतायात हाथ्या ब्यूगुलिं थम्हः नागरिक सर्वोच्चताया निंतिं नैतिकताया आधारय् पदं राजीनामा बियाःगु खँ धयादीगु दु ।
सेना समायोजन सम्बन्धि जूगु सहमति अखः न्ववाना जुइम्ह प्रधानसेनापति रुक्मागं कटवालयात कारवाही यायेत सरकारय् दुथ्याःगु न्यागुलिं दलत न्हापा कटवालयात कारवाही यायेगु खँय् समर्थन यासां लिपाः छक्वलं थःपिनिगु निर्णय परिवर्तन याःगुलिं आक्रोश प्वंकादिल । वयेकलं प्रधानसेनापति कटवालं थःगु पदीय दायित्व हाचांकाःया राजनीतिज्ञ व कुटनीतिज्ञ थें जुया जननिर्वाचित सरकारं ब्यूगु निर्देशनया उल्लंघन याःगुलिं स्पष्टिकरण प्रकृया न्ह्याकाःगु खँ धयादिल ।
छुं न्ह्यः सार्वजनिक जूगु दत्याः न्ह्यःया थःगु भिडियो टेप माओवादीयात बदनाम यायेगु कुतः जूगु धासें प्रधानमन्त्री प्रचण्डं सत्ता कब्जा यायेत माओवादीं ल्वाभ विदेशं नेपाः हःगु धका: धा:गु खँय् आपत्ति प्वंकादिल । वयेकलं सुनां छपू जक ल्वाभ नेपाः दुहांवःगु लुइकेफुसाः थः उकीया कारवाही भोगे यायेत तयार जूगु धयादिल । अथेहे वयेकलं छम्ह जक जनसेना शिविर त्वता: वंगु प्रमाणित जुसाः थः न्ह्याःगु नं सजाय भोगे यायेत तयार जूगु धयादिल ।
माओवादीं सत्ता कब्जा यायेत स्वयाच्वंगु द्वपं बिया सैनिक शासन लागु यायेगु कुतः जुयाच्वंगु द्वपं वयेकलं बियादिल । पीन्याःगु मिनेट भाषण यानादिम्ह प्रचण्डं माओवादीया शान्ति प्रक्रिया व संविधान निमार्ण यायेगु ज्या स्यंकेगु छुं बिचाः मदुगु धासें थुकी थपिं प्रतिबद्ध जूगु धयदिल ।
आः माओवादी प्रतिपक्ष च्वनाः जनताया पक्षय् क्रियाशिल जुइगु धासें वयेकलं न्हूगु कथंया सहमति यायेत दलतय्त इनाप यानादिल । अथेहे वयेकलं राष्ट्रपतिं थःगु पलाः मंभिंकूतल्ले सदन व सतकं आन्दोलन न्ह्यानातुं च्वनीगु धयादिल ।
