नेवाः स्वायत्त राज्य बारे राजनीतिक दलया नेतातय् बिचाः
न्हूगु संविधान निर्माण यायेगु झ्वलय् नेवाः स्वयात्त राज्ययात उगु संविधानय् गुकथंया थाय् दइगु धइगु बारे प्रमुख स्वंगू राजनीतिक दलया शीर्ष नेतातय्सं छगू ज्याझ्वःया दथुइ थःथःगु पार्टीया बिचाः प्वंकूगु दु ।
नेवाः स्वायत्त राज्य मंकाः संघर्ष समितिं आइतवाः यलय् ग्वसाःग्वःगु 'शान्ति प्रक्रिया, संविधान निर्माण व नेवाः स्वायत्त राज्य' विषयस् बृहत राजनीतिक गोष्ठीइ एनेकपा (माओवादी)या नायः पुष्पकमल दाहाल 'प्रचण्ड', नेपाली कांग्रेसया उपसभाति रामचन्द्र पौडेल व नेकपा (एमाले)या न्वकु बामदेव गौतमं पहिचान व समार्थ्यताया आधारय् हे राज्य पुनर्संरचना जुइगु दावी यानादिल । नेतातय्सं आः संघीयतापाखें देय् लिहांवनेमफइगु खँ नं उगु हे ज्याझ्वः मार्फत प्वंकादीगु खः ।
ज्याझ्वःलय् माओवादी नायः प्रचण्डं माओवादीं फुक्कं जाति व वर्गयात अधिकार दयेमाःगु माग ज्वनाः हे जनयुद्ध याःगु न्ह्यथनादिसें माओवादीं पहिचान सहितया राज्यया माग त्वःतेमफइगु धयादिल । माओवादीं नेवाः स्वायत्त राज्यया माग त्वःतिला धइगु शंका विल्कुल गलत जूगु धासें वय्कलं माओवादी नेवाः स्वायत्त राज्य प्राप्तिया निंतिं अन्तिम ई तक ल्वानाच्वनीगु प्रतिबद्धता प्वंकादिल ।
वय्कलं जनयुद्धया इलय् आत्मनिर्णयया अधिकार, स्वायत्तता व स्वशासनया खँ ल्ह्वँगु इलय् मेमेगू राजनीतिक दलं माओवादीयात देय् विखण्डन यायेत स्वःगु द्वपं बिउगु धयादिसें आः उगु हे दलतय्सं नं आत्मनिर्णयया अधिकार व स्वायत्तता स्वीकार याःगु धासें लसता प्वंकादिल ।
कांग्रेस उपसभापति रामचन्द्र पौडेलं राज्य पुनर्संरचनाया विषय जटिल जूगुलिं दुरदर्शी बिचाः मयासें 'सेन्टिमेन्ट'या आधारय् जक पुनर्संरचना यायेमफइगु धयादिल । राज्य पुनर्संरचना यायेगु ज्या पार्टी प्रतिनिधि जक च्वनाः यायेफइगुलिं विज्ञत नाप सहलह याये आवश्यक जूगु वय्कलं धयादिल । न्हापा पहिचानया आधारय् जक राज्य विभाजन यायेमाःगु धयाच्वंगु इलय् कांग्रेसं हे पहिचान व सामार्थ्यया आधारय् राज्य पुनर्संरचना यायेमाःगु खँ ल्ह्वंगु दावी नं वय्कलं यानादिल ।
नेपाः देय् छगूलिं हे नेवाः संस्कृतिया प्रभुत्व दुगु न्ह्यनादिसें वय्कलं छकू जक थासय् नेवाःतय्त सीमित यायेगु पाय्छि मजूगु धयादिल । वय्कलं आः कांग्रेस संघीयता व स्वायतत्ता पाखें ल्यूने मवीगु दावी नं यानादिल ।
अथेहे एमाले न्वकु बामदेव गौतमं एमाले संयुक्त राष्ट्र संघपाखें परिभाषित आत्मनिर्णयया अधिकार व स्वायत्तताया पक्षय् दुगु धयादिल । पार्टीया सुं छम्ह-निम्ह नेतातय्सं संघीयताया विरोध याःसां पार्टीपाखें पहिचान सहितया राज्य पुनर्संरचनाया निर्णय यायेधुंकूगुलिं आः एमालें थुकिं ल्यूने मवनीगु दावी यानादिल ।
नेवाःतय्सं ताः ई तक थःगु हे राजनीतिक व आर्थिक इकाई संचालन यायेधुंकूगुलिं आः पहिचान व सामर्थ्यया आधारय् नेवाःतय्त नेवाः स्वायत्त राज्य बिइफइमखु व नेवाःतय् लागाःय् स्वायत्तताया अधिकार दइमखु धकाः सुनां नं धाये मफइगु दावी यानादिल ।
संघर्ष समितिया नायः दिलबहादुर श्रेष्ठया सभापतित्वय् जूगु ज्याझ्वलय् संघर्ष समितिया सचिवाल कजि मल्ल के. सुन्दरं नेवाः स्वायत्त राज्य मदुगु संविधान नेवाःतय्सं अस्वीकार याइगु धयादिसें नेवाः स्वायत्त राज्य प्राप्ति मजुइकं थ्व आन्दोलन मदिइगु धयादिल ।
ज्याझ्वलय् बैद्ध विहार संघया नायः बाबुराजा शाक्यं लसकुस यानादीगु खःसा नेवाः जागरण मञ्चया संयोजक सुजीव बज्राचार्यं सुभाय् बियादीगु खः ।
