सहमतिय सरकार गठन जुइगु सम्भावना न्यून : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' राष्ट्रपति डा. रामवरणा यादवं सहमतिय सरकार गठनया निंतिं थप यानादीगु स्वन्हुया दुने नं सहमतिय सरकार गठन जुइगु सम्भावना तसकं न्यून जक जूगु दावी यानादीगु दु । वय्कलं थः तसकं सकारात्मक बिचाः याइम्ह व आशावादी मनू जूसां स्वन्हुया दुने सहमतिया सम्भावना म्हो हे जक जूगु धयादिल ।
थौं यलय् जूगु छगू ज्याझ्वलय् न्ववानादिसें नायः प्रचण्डं राजनीतिक दलत दथुइ राष्ट्रिय सहमति लाः जुल तर सहमतिय सरकार गठन यायेत स्वन्हु ई थप यायेत राष्ट्रपतियात इनाप यायेगु खँ जक जूगु धयादिल । वय्कलं भदौ १४ गते नं संविधानसभाया म्याद थप यायेत मेगू राष्ट्रिय सहमितय जुइगु धयादिल ।
वय्कलं पिने सहमति जुइगु धकाः दलतय्सं धयाच्वंसां यथार्थय् सहमति जुइ तसकं थाकूगु धयादिसें थप स्वन्हुया दुने सहमति जुयाः राष्ट्रिय सरकार गठन जुइमाः धइगु पक्षय् थः दुगु धयादिल । वय्कलं तःधंगु पार्टी, लोकतान्त्रिक मान्यता व शान्ति प्रक्रियया छगू हिस्सा जूगुलिं सरकारया नेतृत्वय् माओवादीया दावी स्वभाविक जूगु नं धयादिल ।
यदि सहमतिय सरकार गठन मजुसें माओवादी वा कांग्रेसया नेतृत्वय् बहुमतिय सरकार गठन जूसां शान्ति प्रक्रिया क्वचायेकेत माओवादी प्रतिबद्ध जूगु वय्कलं धयादिल । वय्कलं संविधानसभायात राजनीतिक दलतय्सं सरकार दयेकेगु व क्वथलेगु कथं समान्य संसद जक दयेकूगुलिं आःया समस्या वःगु दावी यानादिल ।
