सहमतिय सरकार गठन यायेत स्वन्हुया ई थप

राजनीतिक दलतय्सं छवाःया दुने राष्ट्रिय सहमतिय सरकार गठन यायेमफेवं राष्ट्रपति डा. रामवरण यादवं सहमतिय सरकार नीस्वनेत स्वन्हुया म्याद थप यानादीगु दु ।

प्रमुख स्वंगू राजनीतिक दल, मधेशी मोर्चा सहित संविधानसभाय् प्रतिनिधित्व याइगु आपालं दलं याःगु इनापयात ध्यानय् तयाः राष्ट्रपति यादवं आइतवाः सहमतिय सरकार नीस्वनेत बुधवाः ५ बजे तकया ई थप यानादीगु खः । राष्ट्रपतियात इनाप याये स्वयां न्ह्यः राजनीतिक दलतय् सर्वदलीय मुँज्या च्वनाः सरकार गठनया निंतिं स्वन्हुया ई थप यायेत इनाप यायेगु निर्णय याःगु खः ।

थ्वस्वयां न्ह्यः राष्ट्रपति यादवं वंगु साउन ३० गते अन्तरिम संविधानया धारा ३८या उपधारा (१) बमोजिम राष्ट्रिय सहमतिय सरकार नीस्वनेत थौं तकया ई बियादीगु खः ।