सरकार व आजाद पुचःया तराई मुक्ति मोर्चा दथुइ खुगू बुँदे सहमति
सरकार व तराईलय् सशस्त्र गतिविधि न्ह्याकाः वयाच्वंगु संयुक्त जनतान्त्रिक तराई मुक्ति मोर्चा (आजाद पुचः) दथुइ खुगू बुँदाय सहमति जूगु दु ।
लुम्बिनीइ च्वंगु छगू होटलय् वंगु चान्हय् जूगु वार्ताय् न्हापा मोर्चालिसे दुगु ल्वाभः सरकारयात लःल्हायेगु सहमति जूगु खः । सरकार व मोर्चा दथुइया वार्ताय् मोर्चाया दुजःतय्गु सुरक्षा सरकारं यायेगु, राज्यं ज्वनातःपिं मोर्चाया कार्यकर्तायात त्वःतेगु लगायत सहमति जूगु खः । मोर्चां थःगु सच्छि स्वयां अप्वः कार्यकर्तातय्त सरकारं ज्वनातःगु दाबी यानावयाच्वंगु खः ।
मेगु वार्ताया तिथि धाःसा सहमतिइ क्वःछिइगु नं धाःगु दु । वार्ताय् सरकारपाखें शान्ति व पुनःनिर्माण मन्त्री पम्फा भुसाल व मोर्चापाखें संयोजक उदयकान्त मिश्र (आजाद)या नेतृत्वया पुचलं ब्वतिकाःगु खः ।
