'प्लाष्टिक म्हिचापाखें मुक्त यायेगु अभियानय् ग्वहालि यानादिसं'
येँ महानगरपालिकाया प्रमुख नापं कार्यकारी अधिकृत गणेश राईं महानगरयात हाकूगु प्लाष्टिक म्हिचापाखें मुक्त यायेगु अभियानय् ग्वहालि यायेत सकसितं इनाप याःगु दु ।
येँ महानगरपालिका वडा नं ६ बौद्धय् शनिवाः जूगु ज्याझ्वलय् न्ववानादिसें प्रमुख राईं महानगरं घोषणा याःगु सच्छि व ख्वीछगू घोषणापत्र २०६८ कार्यान्वयनया ज्या न्ह्यायेधुंकूगुलिं थुकियात पाय्छि कथं कार्यान्वयन यायेफुसाः महानगरया समग्र विकासय् महत्वपूर्ण ग्वाहालि जुइगु खँ धयादिल ।
ज्याझ्वलय् महानगरपालिकाया वातावरण विभागया अधिकृत गंगाधर गौतमं हाकूगु प्लाष्टिक म्हिचां जनस्वास्थय् नकारात्मक लिच्वः लाकीगुलिं महानगरयात हाकूगु प्लाष्टिक म्हिचा मुक्त यायेगु अभियान न्ह्याकागु नं धयादिल ।
अथेहे वडा सचिव हरि कुँवरं महानगरयात प्लाष्टि मुक्त क्षेत्र दयेकेगु अभियान अन्तर्गत भाद्र महिनानिसें स्थानीय दल व क्लब पुचःलिसेंया ग्वाहालिइ थुगु अभियान न्ह्याकागु खँ धयादिल ।
