उपकूलपति प्रा. डा. हिरा बहादुर महर्जनयात हन
ज्ञान बहादुर महर्जन 'नेवा:'
देय्या दकलय् तःधंगु विश्वविद्यालय त्रिभुवन विश्वविद्यालयय् नकतिनि जक उपकूलपति थेंजाःगु गरिमामय पदय् नियुक्त जुयादीम्ह किपूया प्रा .डा. हिरा बहादुर महर्जनयात किपूया नागरिक सरोकार केन्द्रं म्हिग छगू ज्याझ्वःयासें हंगु दु ।
किपू नगरया थीथी संघसंस्था, स्कूल, कलेजया प्रतिनिधिपिंसं खाडां क्वखायेका वय्कःया कार्यकाल सुथां लायेमा धकाः भिंतुसें बधाई देछाःगु खः ।
ज्याझ्वलय् एनेकपा (माओवादी)या शम्भुराम महर्जन, नेपाली काँग्रेसया राजकुमार नकःमि, नेकपा (एमाले)या सुरेन्द्र मानन्धर, नेपाल मजदुर किसान पार्टीया नारायण महर्जन, नेपाः राष्ट्रिय पार्टीया कृष्णहरि महर्जनलिसें किपू नगरपालिकाया कार्यकारी अधिकृत कृष्ण कुमार निरौलां भिंतुना लिसें बधाई बियादीगु खः ।
ज्याझ्वलय् मूपाहाँ सभासद् दिलिप महर्जनं हनापौ लःल्हानादिसें किपूया राजनैतिक दलत छधी जुइमाःगु खँय् बः बियादिल । अथे मजुल धाःसा किपूया जनतां २०१३ साल याःगु सम्बोधनयात साकार यायेमफइगु न्ह्यथनादिसें वय्कलं त्रिबिबि व किपूमितय्गु दथुइ गुगु गाः दुगु खः उकियात त्वपुइ मफइगु खँ कनादिल ।
वय्कलं नेपाल सरकारपाखें गुगु किपूमितय्सं यानाः वयाच्वंगु संघर्षयात थुइका स्वायत्तता याःगु मर्मकथं छगू बांलाःगु ज्या याःगुलिं सरकारयात सुभाय् नं बियादिल ।
