यातायात व्यवसायीतय्सं बन्द लितकाल
नेपाल सरकार व यातायात व्यवसायीत दथुइ बिहीवाः बहनी लिबाक्क तक श्रम मन्त्रालयय् जूगु वार्ता सकारात्मक जुइवं यातायात व्यवसायीतय्सं आव्हान याःगु अनिश्चितकालीन यातायात बन्दया ज्याझ्वः लितकाःगु दु ।
थीथी ४१सूत्रीय माग तयाः आन्दोलनय् कुहांवपिं व्यवसायीतय् अधिकांश माग प्रति सरकार सहमतिया नापं थ्यंगुलिं बन्दया ज्याझ्वः लितकाःगु खः । बन्द लितकायेवं देय्न्यंकयया सार्वजनिक सवारीसाधन सुचारू जूगु दु । नेपाल यातायात व्यवसायी राष्ट्रिय महासंघ, नेपाल ट्रक ट्याङकर ताथ परिवहन व्यवसायी महासंघ, नेपाल ढुवानी व्यवसायी महासंघ व ढुवानी महासंघं बिहीवाः निसें अनिश्चितकालीन यातायात हड्तालया घोषणा याःगु खः ।
व्यवसायीतय्सं चालु आर्थिक दँया बजेटं मजदुरतय् सहकारीयात भन्सार छुट हयेबीगु ज्याझ्वःया लितकायेमाःगु, सतकयात शान्ति क्षेत्र घोषणा यायेमाःगु, यातायात व्यवस्था मन्त्रालय गठन यायेमाःगु नापं सरकारनाप थ्वस्वयां न्ह्यः जूगु थीथी सहमति कार्यान्वयन यायेमाःगु माग याःगु खः ।
