आः न्हूगु सहमति माः - गिरिजा
येँ सन्ध्या टाइम्स÷दलतय् दथुइ सहमति कायम यानाः न्ह्याः वनेमाःगु खँ नेपाली कांग्रेसया सभापति गिरिजाप्रसाद कोइरालां धयादीगु दु । थौं सुथय् थःत नापलाः वःपिं ट्रेड युनियन कांग्रेसया प्रतिनिधितलिसे खँ ल्हासें वय्कलं उगु खँ धयादीगु खः ।
राजनीतिक निकासया विकल्प मदुगु खँ धयादिसें वय्कलं पुलांगु सहमति आः ज्या लगे मजूधुंकूगुलिं न्हूगु हे कथंया
राजनीतिक सहमति कायम यायेमाःगु बिचाः नं प्वंकादिल ।
सहमति सहकार्य व एकतां जक देय्या विकास जुइ धासें वय्कलं आः थम्हं सुन्यंनिसें हाकनं सहमति कायम यायेगु ज्या न्ह्याकेत्यनागु खँ नं वय्कलं कनादिल ।
सरकार संचालनया निंतिं बिस्कं हे संयन्त्रया आवश्यकता दु धासें वय्कलं थुकिया निंतिं फुक्कं राजनीतिक पार्टीया शीर्ष नेतात दुथ्याःगु छगू संयन्त्र दयेकेगु खँ नं कनादीगु दु । संयन्त्र दयेकेगु निंतिं भावी प्रधानमन्त्री माधव नेपाल नं सहमत दुगु खँ नं वय्कलं कनादिल ।
