माओवादी-कांग्रेस दथुइ चक्रिय प्रणालीइ सहमति
न्हूगु सरकारय् थःथःगु नेतृत्व दावी यानाच्वंगु एनेकपा (माओवादी) व नेपाली कांग्रेस दथुइ चक्रिय प्रणाली कथं न्हूगु सहमतिय सरकार गठन यायेगु खँ सहमति जूगु दु । तर निगूलिं दलं चक्रिय प्रणालीइ थःगु नेतृत्व न्हापा जुइमाःगु अडान काःगु दु ।
कांग्रेस संसदीय दलया ज्याकू सिंहदरवारय् जूगु खँल्हाबंलाय् निगूलिं दलं सहमतिय सरकार गठन मजुइकं शान्ति प्रकृया व संविधान निर्माण यायेगु ज्या क्वचायेके मफइगु खँय् सहमति याःसां चक्रिय प्रणालीइ सुनां दकलय् न्हापा नेतृत्व यायेगु धाःसा क्वःछिइ मफुत । निगूलिं दलं थःपिंसं न्हापांगु नेतृत्व याये दयेमाः धकाः तर्क न्ह्यब्वःगु खः ।
माओवादीं थः दकलय् तःधंगु दल जूगु व शान्ति प्रकृयाया छगू हिस्सा जूगुलिं माओवादी नेतृत्वया सरकारं शान्ति प्रकृया क्वचायेके अपुइगु तर्क तःगु खःसा कांग्रेसं शान्ति प्रकृया क्वमचायेकं माओवादीं नेतृत्व यायेमज्यूगु अडान तःगु खः ।
खँल्हाबंला लिपा कांग्रेस महामन्त्री कृष्ण सिटौलां १२बुँदे सहमति लिपा माओवादीं दकलय् बांलागु प्रस्ताव हःगु धयादिसें चक्रिय प्रणालीया नेतृत्व बारे हानं सहलह जुइगु धयादिल ।
