येँया थीथी थाय् यात निषेधित क्षेत्र घोषणा
संविधानसभाया म्याद क्वचायेत आः झिंप्यन्हु जक ल्यँ दुगु इलय् जुइफुगु सम्भावित प्रदर्शनयात ध्यानय् तयाः जिल्ला सुरक्षा समितिं थीथी थाय्यात निषेधित क्षेत्र घोषणा याःगु दु । समितिं स्थानीय प्रशासन ऐन २०२८या दफा ६ (३) बमोजिम मेगू आदेश मजूतलेया निंतिं निषेधित क्षेत्र घोषणा याःगु खः ।
राष्ट्रपति ज्याकूया कम्पाउण्ड क्षेत्रं खवय् ५० मिटर, उपराष्ट्रपति ज्याकूया कम्पाउण्ड क्षेत्र, प्रधानमन्त्री निवास क्षेत्र बालुवाटार, माइतीघर मण्डलानिसें सिंहदरवार पश्चिम पद्मोदय हाइस्कुल, अथेहे माइतीघर मण्डलानिसें सिंहदरवार दक्षिण प्रवेशद्वार जुया हनुमानथान तक व सिंहदरवार पश्चिम द्वारनिसें भद्रकाली देगःया पूर्व दक्षिणी क्षेत्रया पेट्रोल पम्प क्षेत्रतकया सतकयात घोषित निषेधित क्षेत्र दुने लाकातःगु दु ।
येँ प्रमुख जिल्ला अधिकारी लक्ष्मीप्रसाद ढकालं बिहीवाः छगू विज्ञप्ति पिथनाः निषेधित क्षेत्रय् न्हू बानेश्वर चोकपाखें संविधानसभा भवनया पश्चिम सतक जुया पश्चिम पखाःया अन्तिम विन्दुतकया राजमार्गया निगूलिं किनारा, न्हू बानेश्वर चोकनिसें अरनिको राजमार्ग जुया संविधानसभा भवनया दक्षिण पखाःया अन्तिम विन्दुतकया राजमार्गया निगूलिं किनारातकया क्षेत्र धकाः क्वःछिउगु खँ न्ह्यथंगु दु ।
नापं न्हू बानेश्वर चोकनिसें शङ्खमूल वनेगु सतकपाखे ५० मिटरतक, न्हू बानेश्वर चोकनिसें माइतीघर मण्डलापाखे अरनिको राजमार्गया ५० मिटरतक व संविधानसभा भवनया पश्चिमद्वारपाखें हनुमानथानपाखेया सतकया ५० मिटरतक निषेधित क्षेत्र धकाः क्वःछिउगु दु ।
