देय्न्यंकया सार्वजनिक सवारी साधन ठप्प
यातायात व्यवसायीतय्सं थीथी माग यासें आव्हान याःगु हड्तालया हुनिं देय्न्यंकया सार्वजनिक सवारी साधान ठप्प जूगु दु ।
नेपाल यातायात व्यवसायी राष्ट्रिय महासंघ, नेपाल ट्रक ट्याङकर ताथ परिवहन व्यवसायी महासंघ, नेपाल ढुवानी व्यवसायी महासंघ व ढुवानी महासंघं ४१ सूत्रीय माग यासें थनिंनिसें अनिश्चितकालीन यातायात हड्तालया घोषणा याःगु खः ।
हड्तालया हुनिं देय्न्यंक बस, माइक्रो बस, ट्याक्सी, टेम्पो नापं सार्वजनिक सवारी साधान ठप्प जूगु दुसाः थुकिया हुनिं सर्वसाधारणत मर्काय् लाःगु दु । व्यवसायीतय्सं चालु आर्थिक दँया बजेटं मजदुरतय् सहकारीयात भन्सार छुट हयेबीगु, वादी ल्याम्हतय्त ट्याक्सी न्यायेत सहुलियत बीगु थज्याःगु ज्याझ्वःया विरोध याःगु दुसाः सतकयात शान्ति क्षेत्र घोषणा यायेमाःगु, यातायात व्यवस्था मन्त्रालय गठन यायेमाःगु नापं सरकारनाप थ्वस्वयां न्ह्यः जूगु थीथी सहमति कार्यान्वयन यायेमाःगु माग याःगु दु ।
व्यवसायीतय्सं थःपिनि माग सरकारं पूमवंकूसाः कन्हय् निसें निजी सवारी साधन नं चले जुइमबीगु ख्याच्वः बिउगु दु । थ्वहे दथुइ सरकारं आन्दोलनरत व्यवसायीतय्त वार्ताया निंतिं आव्हान याःगु दु ।
