प्रधानमन्त्रीया निम्ह उम्मेदवार दथुइ खँल्हाबंला
राष्ट्रिय सहमतिय सरकारया निंतिं एनेकपा (माओवादी) व नेपाली कांग्रेसं न्ह्यःने हःपिं प्रधानमन्त्रीया उम्मेदवारत डा. बाबुराम भट्टराई व शेरबहादुर देउवा दथुइ खँल्हाबंला जूगु दु । उगु इलय् माओवादी नायः पुष्पकमल दाहाल 'प्रचण्ड' व कांग्रेस महामन्त्री विमलेन्द्र निधिया नं ब्वति दुगु खः ।
खँल्हाबंलाया झ्वलय् माओवादीं निगूलिं दलं सरकारया नेतृत्व यायेदइगु कथं आलोपालोया सरकार दयेकेगु प्रस्ताव तःगु दु । प्रस्ताव कथं माओवादीं आः सरकारया नेतृत्व यानाः शान्ति प्रकृया क्वचायेगु व संविधान जारी यायेगु व लिपा निर्वाचनया इलय् कांग्रेसं नेतृत्व यायेगु खँ न्ह्यथंगु खः ।
तर कांग्रेसं धाःसा आः हे कांग्रेसयात सरकारया नेतृत्व याये बिइत इनाप यासें निर्वाचनया इलय् माओवादीयात नेतृत्व यायेत इनाप याःगु खः । माओवादीं धाःसा थःगु नेतृत्वय् आः सरकार गठन जूसाः सेना समायोजन, शान्ति प्रकृया क्वचायेकेत व संविधान जारी यायेत अःपुइगु खँ धाःगु खः ।
