चिनियाँ उच्चस्तरीय पुचः येँय् थ्यनेवं नापलाय् ज्याय् व्यस्त
चिनियाँ राष्ट्रपति हु जिन्ताओया विशेषदूत झाओ योङकाङ नेतृत्वया मंगलवाः नेपाः वःगु उच्चस्तरीय पुचः नापलाये ज्याय् व्यस्त जूगु दु ।
चिनियाँ कम्युनिष्ट पार्टीया केन्द्रीय समितिया राजनैतिक ब्युरो सम्बन्धी स्थायी दुजः झाओया नेतृत्वय् वःपिं स्वम्ह मन्त्री व प्यम्ह उपमन्त्रीलिसे ६०म्हेसिया पुचलं मंगलवाः हे नापलायेगु ज्यायात तिब्रता ब्यूगु खः । चिनियाँ पुचःयात नापलायेत एकीकृत नेकपा (माओवादी)या नायः पुष्पकमल दाहाल 'प्रचण्ड'लिसेया फुक्क पदाधिकारीत होटल सोल्टी थ्यंकूगु खः । नापलाये ज्याय् निगू पार्टी व निगू देय्या स्वापु व ग्वाहालि कालबिल सम्बन्धी सहलह जूगु खः ।
अथेहे उगु पुचलं मंगलवाः हे कांग्रेस सभापति सुशील कोइरालालिसे नं नापलानादीगु खः । चिनियाँ कम्युनिष्ट पार्टीया कानुन लिसे राजनीतिक आयोगया प्रमुख नापं जुयाच्वंम्ह झाओ च्यादँ थुके नेपाः भ्रमणय् वम्ह वरिष्ठ चिनियाँ अधिकारी खः ।
स्वन्हुन्यंकया नेपाः भ्रमणय् वःगु झाओ नेतृत्वया पुचःयात त्रिभुवन अन्तर्राष्ट्रिय विमानस्थलय् प्रधानमन्त्रीया ज्याकू स्वइम्ह मन्त्री घनश्याम भुषालं लसकुस याःगु खः । नेपाः च्वनेगु झ्वलय् झाओ नेतृत्वया पुचलं राष्ट्रपति डा. रामवरण यादव, कामचलाउ सरकार प्रधानमन्त्री झलनाथ खनाल सहित प्रमुख राजनीतिक दलया वरिष्ठ नेतातलिसे नापलानादीगु ज्याझ्वः दु । भ्रमणया झ्वलय् नेपाः व चीन सरकार दथुइ आर्थिक लिसे प्राविधिक सहायता सम्बन्धी प्यंगू सम्झौताय् ल्हाःचिं नं तइगु जानकारी परराष्ट्र मन्त्रालयं ब्यूगु दु ।
किपा : सिन्ह्वा
