कांग्रेस-एमाले दथुइ न्हूगु सरकार गठन बारे सहलह
प्रधानमन्त्री झलनाथ खनालं राजीनामा बिइधुंकूगु इलय् न्हूगु राष्ट्रिय सहमतिय सरकार गठनया निंतिं नेपाली कांग्रेस व नेकपा (एमाले)या नेतात दथुइ थौं सहलह जूगु दु ।
भावी सरकार सहमतिय रुपय् गठन यायेगु ताः तयाः निगू दलया नेतात दथुइ थौं सुथय् कांग्रेस सभापति सुशील कोइराला निवासय् खँल्हाबंला जूगु खः । खँल्हाबंलाय् सभापति कोइरालां माओवादी व कांग्रेसं सरकारया नेतृत्व यायेधुंकूगुलिं आः कांग्रेसया नेतृत्वय् सरकार गठन यायेत ग्वाहालि यायेत इनाप यानादीगु खः ।
खँल्हाबंलाया निंतिं कोइराला निवास महाराजगञ्ज थ्यंकूपिं एमाले नेतात ईश्वर पोखरेल, भीम रावल व शंकर पोखरेलं माओवादी व कांग्रेस दथुइ सहमति जूसा एमालेयात न्ह्याम्हेसिया नेतृत्वय् सरकार गठन जूसां आपत्ति मदुगु बिचाः प्वंकूगु खः । एमाले नेतातय्सं यदि माओवादी नेतृत्वया सरकार गठन यायेगु खःसा माओवादीं शान्ति प्रक्रिया पूवंकेगु प्रतिबद्धता प्वंकेमाःगु खँ धाःगु खः ।
लिसःलय् कांग्रेस सभापति कोइरालां सहमतिय सरकार गठनया निंतिं थःम्ह पार्टी दुने सहलह यायेगु जानकारी बियादीगु खः । उगु इलय् कांग्रेसया पाखें सभापति कोइराला नापं महामन्त्री कृष्ण सिटौला, नेतात डा. प्रकाशशरण महत व डा. मिनेन्द्र रिजालया नं ब्वति दुगु खः ।
