गु कथं विभाजन यानातःगु दु कांग्रेसं न्हय्गू प्रदेश?
संविधान निर्माणया झ्वलय् दलकय् विवादित विषय जुयाच्वंगु राज्य पुनर्संरचनाया बारे कांग्रेसं छवाः न्ह्यः थःगु प्रस्ताव पार्टीया मुँज्याय् न्ह्यब्वःगु दु ।
कांग्रेसया संविधान निर्माण सम्बन्धी सुझाव समितिया संयोजक रामचन्द्र पौडेलं साउन २२ गते च्वंगु कांग्रेस केन्द्रीय मुँज्याय् पहिचान व सामर्थ्ययात मू आधार दयेकाः न्हय्गू प्रदेश दुगु प्रस्ताव सहलहया निंतिं न्ह्यःब्वःगु खः ।
पहाडी क्षेत्रय् प्यंगू, मधेशय् निगू व स्वनिगःयात राजधनी प्रदेश धकाः कांग्रेसं न्हय्गू प्रदेशया प्रस्ताव तःगु खः । राजधानी प्रदेश धकाः छगू प्रदेशया नां क्वःछिउगुसां ल्यँ दुगु खुगू प्रदेशया नामाकरण व सीमांकन धाःसा यानातःगु मदु । कांग्रेसं फुक्कं प्रदेशया नां व सीमा सहलह यानाः क्वःछिइगु जानकारी बिउगु दु ।
कांग्रेसं राज्य पुनर्संरचनाया छगू मू आधार पहिचान धाःसां थुकियात गुकथं सम्बोधन यायेगु धकाः धाःसा स्पष्ट मयानी । सीदु कथं कांग्रेसं न्ह्यब्वःगु न्हय्गू प्रदेशय् खस-ब्रम्हु समुदायया हे बहुमत दइ कथं न्हगू प्रदेशया लागा क्वःछिनातःगु दु ।
केन्द्रीय समितिया मुँज्याय् न्ह्यब्वःगु न्हय्गू प्रदेशय् विभाजन यानातःगु लागा थु कथं दु:-
प्रदेश १ : फुक्कं महाकाली व कर्णाली अञ्चलया भूभाग नापं सेती व भेरीया अधिकांश भूभाग
प्रदेश २ : फुक्कं गण्डकी अञ्चलया भूभाग, अथेहे धौलागिरी, राप्ती व लुम्बिनीया अधिकांश भूभाग
प्रदेश ३ : परासी निसें पश्चिम कैलाली जिल्लाया बच्छि भूभाग
प्रदेश ४ : स्वनिगः बाहेकया बाग्मती अञ्चल, अथेहे जनकपुर अञ्चलया पहाडी जिल्ला नापं अधिकांश सगरमाथा अञ्चलया भूभाग
प्रदेश ५ : पूर्वय् कोशी व पर्सा-बारा तकया तराईया जिल्लाया भूभाग
प्रदेश ६ : मेची व कोशी अञ्चलया उत्तर निसें दक्षिण तक व सगरमाथाया छुं पहाडी जिल्लाया भूभाग
प्रदेश ७ : स्वनिगःया फुक्कं भूभाग
