प्रमुख दलतय्सं ग्वाहालि मयागुलिं राजीनामा : प्रम
प्रधानमन्त्री झलनाथ खनालं शान्ति प्रक्रियाय् ठोस पला न्ह्याकेत प्रमुख राजनीतिक दलतय्सं ग्वाहालि मयागुलिं थःम्ह नैतिकताया आधारय् प्रधानमन्त्रीया पदं राजीनामा बियागु खँ धयादीगु दु । वय्कलं प्रमुख दलतय् ग्वाहालि मदुलिं हे व्यवस्थापिका संसदय् बहुमत दुसां राजनीतिक व नैतिकरुपं राजीनामा बियागगु धयादिल ।
राष्ट्रपति डा. रामवरण यादवयात थःगु राजीनामा पौ लःल्हाःगु छन्हु लिपा थौं संसदय् न्ववानादिसें वय्कलं शान्ति प्रक्रिया न्ह्यःने न्ह्याकेत माओवादी प्रतिबद्ध मजूगु व थःगु नेतृत्व बिना शान्ति प्रक्रिया व संविधान निर्माण जुइमखु धइगु कांग्रेसया बिचाः महिउसाः शान्ति व संविधान निर्माण सम्भव मजूगु धयादिल ।
शान्ति प्रक्रियाय् ठोस प्रगति जुइमाः धकाः विरोध व विवादया बाबजुद न्हय्गू बुँदे सम्झौता, गृह मन्त्रालय माओवादीयात व माओवादीया मन्त्रीत हिलागु धयादिसें प्रधानमन्त्री खनालं माओवादीं शान्ति प्रक्रियाय् पहलकदमी भूमिका म्हितेमफुगु गुनोसो यानादिल ।
वय्कलं सेना समायोजन, राज्य पुनर्संरचना, शासकीय स्वरुप व निर्वाचन प्रणालीया बारे जक दलत दथुइ सहमति जुइ ल्यँ दनीगु जानाकारी बियादिसें उगु फुक्कं विषयलय् गम्भीर जुयाः सहलह याःसा याकन हे संविधानया मस्यौदा जारी यायेफइगु धयादिल ।
माओवादीया ग्वाहालिइ माघ २० गते प्रधानमन्त्री जुयादीम्ह प्रधानमन्त्री खनालं थः प्रधानमन्त्री पदं राजीनामा बिउसां शान्ति प्रक्रिया व संविधान निर्माणय् निरन्तर ग्वाहालि यानाच्वनीगु प्रतिबद्धता नं प्वंकादिल ।
