संचारकर्मीतय्त आक्रमण याःपिंत कारवाही या : मानवअधिकार आयोग

राष्ट्रिय मानवअधिकार आयोगं देया थीथी थासय् संचारकर्मीतय्त जूगु आक्रमणप्रति थःगु ध्यानाकर्षण जूगु धासें दोषीतय्त कारवाही यायेत सरकार नाप माग याःगु दु ।

आयोगं थौं छगू विज्ञप्ति पिथना पूर्वाञ्चलया थीथी जिल्लाय् प्रेसयात लक्षित जुयाः जूगु घटनाया दोषीतय्त कानूनी दायराय् हयेत सरकार नाप माग याःगु दु । नापं संविधान प्रदत्त मौलिक अधिकार अभिव्यक्ति स्वतन्त्रताया संरक्षण यायेत फुक्कं उपाय अवलम्बन यायेत सरकारयात इनाप नं याःगु दु ।

अथेहे विज्ञप्तिइ धम्की व आक्रमणया घटना बन्द यायेत, सञ्चारमाध्यमय् प्रकाशित/प्रशारित बुखँय् असहमति जूसाः कानुनसम्मत प्रकृया अवलम्बन यायेत, नागरिकया अभिव्यक्ति स्वतन्त्रताया सम्मान यायेत व सञ्चारकर्मीतय्त आचार संहिताया पालना यायेत इनाप यानातःगु दु ।