दलत दथुइ न्हूगु सहमति आवश्यक : कोइराला

नेपाली कांग्रेसया सभापति गिरिजाप्रसाद कोइरालां राजनीतिक दलत दथुइ न्हूगु सहमति यानाः न्ह्याः वनेमाःगु खँ धयादीगु दु ।

शुक्रवाः नेपाल ट्रेड युनियन कांग्रेसं न्हूगु संविधानय् मजदुरतय् माग सुरक्षित यायेमाःगु माग तयाः कोइरालायात ज्ञापनपौ लःल्हा वंगु ईलय् सभापति कोइरालां थ्व खँ धयादीगु खः । वयेकलं आः पुलांगु सहमितं ज्या मयाइगुलिं हाकनं शुन्य पाखे शुरु यायेमाः धयादिल ।

वयेकलं आः न्हूगु सरकार संचालनया निंतिं सत्तारुढ दलतय् सर्वदलीय संयन्त्र निर्माण याइगु व उकी दक्व प्रमुख दलया नेता च्वनेमाः धयादिल । वयेकलं 'सर्वदलीय मेकानिज्म' देयेकाः उकीया हे निर्देशनय् जक सरकार संचालन जुइगु खँ धयादिल ।

कोइरालां ज्ञापनपौ बुझेयानाः कायेधुंकाः थः मजदुर अधिकार सुनिश्चिताया निंतिं अन्तिक ई तक संघर्ष यानाच्वनीगु खँ धयादिल ।