बोडेया गार्मेन्ट कारखानाय् ल्वापु, झिंखुम्ह घाःपाः
मध्यपुर थिमि नगरपालिका - ३ बोडेसं च्वंगु आस्मा गार्मेन्टया मजदुर व स्थानियवासी दथुइ ल्वापु जुया झिंखुम्ह मनूत घापा जूगु दु । ल्वापुइ गार्मेन्ट मजदुरपाखे झिंन्याम्ह व स्थानीयपाखे छम्ह याना झिंखुम्ह मनूत घाःपा जूगु व घापा जूपिं मजदुरिपंत कोरिया - नेपाल मैत्री अस्पतालय् वास जुयाच्वंगु महानगरीय प्रहरी वृत्त थिमिं जानकारी ब्यूगु खः ।
लालु हुसेनं न्ह्याकुगु उगु गार्मेन्टय् न्हिनय् व बहनी लिबाक्कतक्क ज्या जुइगुलिं स्थानीयवासीतय्त समस्या जुगु जानकारी ब्युसें गार्मेन्ट बन्द यायेत बोडेया बासिन्दां छुं दिंनिसें दबाब बिया वयाच्वंगु ख । उगु हे विषययात कया सञ्चालक लिसे स्थानीय दथुइ वंगु बिहीबा विवाद जुगु व वंगु बहनी ल्वापु जुगु प्रहरीं जानकारी ब्यूगु खः । स्थानीयं गार्मेन्ट बन्द यायेत माग याना मजदुरतय्त अप्पां क्यकेत स्वयेवं ल्वापुया स्थिति पिहांवगु गार्मेन्ट सञ्चालकया दाबी खः । ल्वापुया झ्वलय् गार्मेन्टदुने स्थानीयं कुनातपिं नीम्ह स्वया आपालं मजदुरतय्त प्रहरीं छघौलिपा उद्दार याःगु खः ।
