राजीनामा प्रधानमन्त्रीया हे स्वविवेकया विषय : माओवादी
एकीकृत नेकपा (माओवादीं) प्रधानमन्त्री झलनाथ खनालं राजीनामा यायेगु वा मयायेगु विषय वय्कःया हे स्वाविवेकया खँ जूगु निष्कर्ष पिकागु दु ।
माओवादी नायः पुष्पकमल दाहाल 'प्रचण्ड'या न्हू बजारस्थित छेँय् शुक्रवाः च्वंगु पदाधिकारीतय् मुँज्यां प्रधानमन्त्रीयात राजीनामा यायेत वा मयायेत छुं नं कथंया दबाव मबीगु निर्णय याःगु दु । माओवादीं राजीनामाया विषय प्रधानमन्त्री थःया हे स्वविवेकया खँ जूगुलिं दबाव मबिइगु खँ क्वःछिउगु खः ।
प्रधानमन्त्री झलनाथ खनालं शान्ति प्रक्रियाय् छुं प्रगति मजूसाः साउन २८गते राजीनामा बिइगु घोषणा लिपा माओवादीया थुगु धापु सार्वजनिक जूगु खः । पदाधिकारी मुँज्या लिपा माओवादी छ्याञ्जे सीपि गजुरेलं राजीनामाया खँ प्रधानमन्त्रीया स्वविवेकया विषय जूगुलिं माओवादीं राजीनामा बिउ वा बिइमते धकाः छुं नं मधायेगु धयादिल ।
वय्कलं सरकारया नेतृत्वया यानाच्वंगुलिं प्रधानमन्त्रीं राजनीतिक 'ब्रेक थ्रु' जुइ कथंया प्रस्ताव हयेमाःगु नं धयादिल ।
