रोजी हत्याकाण्ड : देय् दबू व जागरण मञ्चया विरोध
नेवाः देय् दबू व नेवाः जागरण मञ्चं कुपण्डोलया ज्वागलय् च्वनीम्ह २१दँया रोजी महर्जनयात अपहरण लिपा विभत्स रुपं हत्या याःगु घटनाया घोर र्भत्सना याःगु दु । देय् दबूया नायः नरेश ताम्राकार व जागरण मञ्चया संयोजक सुजीव बज्राचार्यं थौं बिस्कं बिस्कं विज्ञप्ति पिथना हत्यारा नापं घटना संलग्नपिंत कडा स्वयां कडा कारवाही यायेत माग यानातःगु दु ।
देय् दबूलिं पिकाःगु विज्ञप्तिइ स्वनिगलय् अपराधिक ज्या अप्वया वनाच्वंगु खँय् सम्बन्धीत पक्षया ध्यानाकर्षण यासें देशय् शान्ति सुव्यवस्था कायम यायेत जोरदार माग यानातःगु दु ।
अथेहे जागरण मञ्चया विज्ञप्तिइ स्वनिगलय् दुने पिनें वयाः च्वनाच्वंपिं मनूतय्सं थुकथं याःगु अपराधं नेवाःतप्रति तःगु कुदृष्टि थुकिं प्रकट जूगु खँ न्ह्यथनातःगु दु । विज्ञप्तिइ सकल नेवाःतय्त सचेत जुयाः थुकथंया आपराधिक गतिविधियात पनेत संगठित जुयाः न्ह्यायेत नं इनाप यानातःगु दु ।
