बन्दया हुनिं यल ठप्प
यलया कुपण्डोलस्थित ज्वागलय् च्वम्ह २१दँया रोजी महर्जनयात स्याःगु विरोधय् ज्यापु समाज यलं आव्हान याःगु बन्दया हुनिं थौं यल ठप्प जूगु दु ।
बन्दया आव्हानकर्ता नापं यलया स्वतःस्फुर्त जनता सुथं निसें यलाया थीथी थासय् च्वनाः प्रदर्शन याःगु खःसा वस्वयां न्ह्यः हत्यारायात कडा कारवाहीया माग यासें यलध्वाखां छगू र्याली पिदंगु खः । र्याली लिपा नं अनया जनतां स्वतःस्फुर्त रुपं यलया कुपण्डोल, पुल्चो, सातदोबाटो, ग्वार्को, एकान्तकुना, नख्खु आदि थासय् प्रदर्शन यानाच्वंगु दु ।
बन्दया झ्वलय् प्रदर्शनकारीतय्सं बा. १. ज. ५७७५ नम्बरया माइक्रोबस, बा. १. ख. ५०९३, बा. २. ख. ३२९०, ना. ३. ख. २९८३ व बा. २. ख. ७७६, बा. २ ख ४६७६ नम्बरया बस, बा. २. छ. ४५५९ नम्बरया निजी कार, बा. ९ प ७४१३ नम्बरया मोटरसाइकल नापं छगू दर्जनं मल्याक सवारी साधानय् तोडफोड यानाबिउगु दुसाः साइकल तकं चले यायेत पंग थंगु दु । थ्वहे दथुइ सवारी साधानय् अवरोध यायेत स्वःपिं आपालं प्रदर्शनकारीतय्त प्रहरीं ज्वनायंकूगु दु ।
अथेहे बन्दया हुनिं यलया शैक्षिक संस्था, कलकारखाना, उद्योग लगायत पूर्णरुपं ठप्प जूगु दुसाः बन्दया प्रभाव येँ व ख्वपया छुंछुं थासय् तकं लाःगु दु ।
डेटिंगया बहानाय् सिमपानी भञ्ज्याङस्थित लेलेय् सःताः थः मतिनामि सुभाष उप्रेतीं पासापिनि ग्वहालिइ महर्जनयात गोलीं कयेका स्याःगु खः । अभियुक्त रेग्मीनापं सचित खड्का व हुसेन राईयात प्रहरीं ज्वनेधुंकूगु दु ।
