ऊर्जामन्त्रीया नेतृत्वय् सरकारी ज्याकूया मत त्वाःल्हात
नेपाल बिद्युत प्राधिकरणं महशुल मपूगु सरकारी ज्याकुथिइ मतया लाइन त्वाःल्हायेगु ज्या न्ह्याकादीगु दु । प्राधिकरणं बिहीवाः महशुल मपूगु येँया निगू व पोखरा नापं बुटवलया बागू दर्जन सरकारी ज्याकूया लाइन त्वाःल्हानादीगु खः ।
ऊर्जामन्त्री गोकर्ण बिष्टं घोषणा याःकथं बिहीवाः येँया बबरमहलय् च्वंगु सतक विभाग व सिंहदरबार दुनेया हे पुनःनिर्माण समितिया ज्याकूया मतया लाइन त्वाःल्हाःगु खः । अथेहे पोखराय् दकले अप्वः ख्वीस्वंगू लख झिंछद्वः तका मतया महशुल मपूगु रेडियो नेपाल क्षेत्रीय प्रसारण केन्द्रलिसे बागू दर्जन ज्याकूया लाइन त्वाःल्हाःगु खः । पोखराया जिल्ला वन ज्याकू, जिल्ला प्रशासन, निर्वाचन आयोगया ज्याकुथि लगायतया सरकारी ज्याकूया लाइन त्वाःल्हाःगु दु ।
प्राधिकरणं मंगलवाः सनिलय् तक्क महशुल पुलेगु ई ब्यूगु खः । मंगलवाः बहनी लिबाक्क तक्क प्राधिकरणं ज्याकुथिइ च्वनाः मत त्वाःल्हायेगु ज्याकुथिया धलः तयार याःगु खः । सिंहदरबार दुनेया आपालं सरकारी ज्याकुथिइ मंगलवाः सनिलय् तक्क महशुल भुक्तानी यायेधुंकूगुपिनिगु लाइन त्वाःमल्हाइगु प्राधिकरणया छम्ह अधिकारीं धाःगु खः ।
प्राधिकरणं महशुल पुलते ब्यूगु लिपांगु ई मंगलवाः छन्हुं हे थीथी सरकारी ज्याकुथिं झिंस्वंगू करोड तका महशुल पूगु खः । थीथी मन्त्रालय अन्तर्गत देय्न्यंकया ज्याकुथिं महशुल मपुलाः बिद्युत प्राधिकरणया बक्यौता अप्वयाः वंगु खः । थौंकन्हय् प्राधिकरणया दच्छिया घाटा न्यागू अर्ब तका स्वयाः अप्वः दु ।
