प्रमपाखें साउन २८ गते राजीनामा बिइगु प्रतिबद्धता / संसदया मुँज्या न्ह्यात
प्रधानमन्त्री झलनाथ खनालं व्यवस्थापिका संसदया मुँज्याय् साउन २८ गते तकया दुने नं शान्ति प्रक्रियाय् प्रगति मजूगुसा राजीनामा बिइगु प्रतिबद्धता प्वंकेवं संसदया मुँज्या न्ह्याःगु दु ।
प्रधानमन्त्री खनाल बिरामी जूगु हुनिं संसदय् उपस्थिति जुइमफुसां वय्कःया लिखित प्रतिबद्धतायात उपप्रधान नापं अर्थमन्त्री भरतमोहन अधिकारीं संसदय् ब्वना न्यंकादीगु खः । प्रधानमन्त्रीया प्रतिबद्धताय् २८ गते तक नं शान्ति प्रक्रियाय् छुं नं प्रगति मजूसाः सरकारया औचित्य क्वचाइगु खँ न्ह्यथनातःगु दु ।
संसदय् प्रधानमन्त्रीया प्रतिबद्धता वयेवं च्याक्वः तक संसद्या मुँज्या अवरोध याःगु नेपाली कांग्रेसं थःगु संसद अवरोध यायेगु ज्याझ्वः स्थगित याःगु खः । कांग्रेस संसदीय दलया नेता रामचन्द्र पौडेलं २८ गते तक नं राजीनामा मवःसा हानं संसद मुँज्याय् अवरोध यायेगु धयादिल ।
ताः ई न्ह्य निसें संसदया मुँज्याय् कांग्रेसं अवरोध या हुनिं बजेटया बारे सहलह जुइमफुगु खःसा आः थुकिया बारे बिहीवाः निसें सहलह न्ह्याइगु जूगु दु ।
