महशुल मपूगु सरकारी ज्याकूया मत त्वाःल्हाइगु
नेपाल बिद्युत प्राधिकरणं महशुल मपूगु सरकारी ज्याकुथिइ थनिंनिसें मतया लाइन त्वाःल्हाइगु जूगु दु । ऊर्जामन्त्री गोकर्ण बिष्टया नेतृत्वय् थौं न्हिनय् येँया छुं छुं सरकारी ज्याकुथिइ मतया लाइन त्वाःल्हायेगु जानकारी ब्यूगु दु ।
प्राधिकरणं म्हिगः सनिलय् तक महशुल पुलेगु ई ब्यूगु खः । म्हिगः बहनी लिबाक्क तक नं प्राधिकरणं ज्याकुथिइ च्वनाः मतया लाइन त्वाःल्हायेगु ज्याकूया धलः तयार याःगु दु । सिंहदरबार दुनेया फुक्क सरकारी ज्याकुथिं म्हिगः सनिलय् तक महशुल भुक्तानी यायेधुंकूगुलिं लाइन त्वाःमल्हायेगु प्राधिकरणया छम्ह अधिकारीं जानकारी ब्यूगु दु ।
प्राधिकरणं महशुल पुलेत ब्यूगु लिपांगु ई म्हिगः छन्हुं हे थीथी सरकारी ज्याकुथिं झिंस्वंगू करोड तका महशुल पूगु खः । थीथी मन्त्रालय अन्तर्गतया देय्न्यंकया ज्याकुथिं महशुल मपुलाः विद्युत प्राधिकरणया बक्यौता अप्वयाः वंगु दु । थौंकन्हय् प्राधिकरणया दच्छिया घाटा न्यागू अर्ब तका स्वयाः अप्वः दु ।
